Shillong, Risaw 23
U kapten ka Nongkseh Sports and Cultural Club (S&CC), u Hardy Cliff Nongbri u la pynpaw ba ka thong jong ka klob ka long ban ïoh rung shaduh ka Indian Football League (IFL).
Une u rangïalehkai barim ka Shillong Lajong FC uba la ïalehkai katto katne snem ha ka lympung I-League, u la pynïasoh sha ka Nongkseh hashwa ba kan ïakhun ha ka First Division ha u snem ba la lah bad ban khur syndon ïa ka nam lahduh. Hapoh ka jingïalam jong u, katei ka klob kaba la shim bynta mynta u snem ha ka Shillong Premier League bad rah ïa ka nam lahduh ha ka Super Cup.
“Nga ai khublei ïa u President ka klob lem bad ka shnong Nongkseh kaba ngim poi pyrkhat namar tang hapoh shi snem ngi la poi shaduh kane ka thong. Ha u snem ba la lah, ngi dangdon ha ka First Division, nangta ngi ïashim bynta ha ka Champions Cup bad ngi la lah ban khur nam lahduh ruh ha Sikkim, kumjuh ha MSL bad mynta ka kynti ngi la rung sha ka I-League 3,” la pynpaw u Hardy ha ki lad pathai khubor ha ka sngi Balang ha kaba u la ai ka jingsngewnguh ba kine baroh ki dei lyngba ki jingtrei shitom jong ka klob hi baroh kawei.
“Naduh ba nga la pynïasoh sha ka Nongkseh, nga la ïakren bad ki bor pynïaid ka klob ba kane ka jingshim bynta kam dei ban kut tang ha ka Shillong League, hynrei ba ngin kiew suki pa suki na kawei ka kyrdan kata naduh ka I-League 3, I-League 2 bad wat shaduh ka Indian Football League,” la pynpaw u Hardy ha ki lad pathai khubor ha ka sngi Balang.
