Amlarem, Risaw 23
Ki lympung ïalehkai 2nd Division bad 1st Division Football League ba la pynïaid da ka Amlarem Sub-Divisional Sports Association (ASSA) ki la nangjam shaphrang ha ka sngi Thohdieng ha Mini Stadium kaba ha Ladjaplem, Amlarem.
Ha ka jingïalehkai jong ka 2nd Division hapdeng ka ACP Padu bad Umpohliew SC Amtra ki la ïasam mar shi poiñ hadien ba kim shym la lah ban pynkhih jar haduh kaba kut ka jingïalehkai.
Ha ka jingïalehkai kaba bud, ka Everlasting Sohkha ka la pynliem noh ïa ka Lumpyngngad SC da 1-0 kol bad ïa kane la thep da u R. Umlong ha ka minit kaba 45.
Haba phai sha ka kyrdan ïalehkai 1st Division, ka Ïaikyntiewpamtbuh ka la jop da 3-0 kol ïa ka Raplang Hawai Bhoi. U B. Surong u la thep ar kol ha ka minit kaba nyngkong bad 24, katba ïa kawei pat la thep da u E. Suting (72).
Ha ka jingïalehkai kaba khatduh, hapdeng ka Amlanai Young Boy bad ka Dawki AC ki la ïakhaid mar 1-1 kol.
Watla kine ki kynhun kim shym la lah ban pynkhih jar ha ka kylla step, hynrei ka Dawki ka la thep nyngkong ha ka kylla miet lyngba u W. Langstang (55). Na ka liang ka Amlanai Young Boy ka la lah ban pynphai kylla lyngba u B. Mukhim (70) na ka bynta ban ïakhaid mar shi kol.
