Mairang, Risaw 23
Ka kynhun ïalehkai jong ka Thangmaw SCC ka la long ka lahduh ha ka Mairang Super League 2026 ba la pynïaid da ka Pyndengumïong District Sports Association (PDSA), hadien ba ka la pynliem noh ïa ka Myriaw CSC da 6-0 kol ha ka jingïakhun phainal kaba la long ha ka sngi Thohdieng ha madan Dom Mawlum Pyndengumïong ha Mairang, Eastern West Khasi Hills District.
Ha kane ka jingïakhun la wan sakhi lang da u EM ka KHADC uba dei ruh u MDC ka Mawthadraishan u Bah Powell Sohkhlet kum u kongsan ha ryngkat ka jingsynran lang u Syiem khynnah ka Hima Nongkhlaw u Paiem K.M Syiemlieh, ki nongkitkam ka synjuk bad kiwei kiba la shah khot sngewbha ha ryngkat ki hajar ngut ki paidbah kiba la wan ban sakhi ïa kane ka jingïalehkai.
Haba phai sha kane ka jingïakhun phainal, ka Thangmaw ka la ïalehkai bha bad thep 4 kol ha ka kylla step. Ha ka kylla miet ka Myriaw ka la pyrshang ban pynphai, hynrei kam shym la lah ban pynphai na ka daw ka jingtbit ki rangïalehkai ka Thangmaw. Te kumta ka Thnangmaw ka la ïoh ban thep biang sa 2 kol na ka bynta ban khur syndon ïa ka jingjop.
Te kumta ka Thangmaw kum ka lahduh, ka la ïohpdiang ïa ka khusnam pisa kaba T. 1 lak tyngka lem bad ka Trophy.
