U Nongsaiñ Hima,1979
Ka spah jong ka ri kam shong tang ha ka jingbun ki shakri Sorkar ne ki nongtrei kamai jakoh hynrei ka shong eh ha ka jingbun ki nongpyrkat bad nongtrei ban sei ïa ka spah ka hajar na ka pneh jong ki ri lum jongngi ïa kaba ka Mariang ka la theh sei.
Balei ka ri Bilat bad ka ri America ki roi bad ki riewspah haduh katne ? Ka daw ka long namar ba kine ki ri ki bun kum kita ki briew bad kita ki briew ki nang ban pyndonkam ia ka spah ka phew kaba ka Mariang ka la ai sngewbha ha ki ri jong ki. Shi kyntien tang ban shu niew tang, ka ri jong ngi ka dap da u siej, u phlang bad ki dieng kiba bha shibun eh ban shna kot sada, hynrei kumno ngi pyndonkam ïa ki ? Bun bah la shu thang dieng iap ïa ki, ne la shu pom kai ba wit ka bri, bad ïa u phlang la shu thang khnang ba un mih lung kloi ban ioh bam ka blang ka masi bad kumta ter ter. Peit kein pyrkhat kumno ngi pynlehnoh ei ïa ka spah ka ri bad lada lah ban pyndonkam ym wallam ïa ka spah bad ka jingroi ïa ka ri bad ïa u khun u hajar. Lada don ka bor shna kot sada kine ki mar kin pynmih shibun ki jingmyntoi. Ka ri ka donkam shibun ki samla ki ban da pyrkhat jylliew bad kham bniah ïa kine. Bun kiba ong bangin don spah ne hajar ban trei ïa kane ka kam bah kam san.
Don ka jingshisha ba kane ka jingong.Hynrei pyrkhat ïa kiwei pat ki ri phareng ki leh kumno, phi tharai kito ki samla ki la long kiba la don spah lypa ? Em phi, hynrei kine ki wad lad kumno ban ioh ïa ka spah da kaba pynlong ki Synjuk – lang (Cooperation ne Company) ban lum ïa ki pisa. Ki pyrkhat bad ki ïai wad lad, kim shong kli kti ban shu bynniaw hynrei ki pyrkhat tyngeh ban jop. Bun na ki samla jong ngi kiba la nang la stad bad kiba riewspah ha ka jabieng kaba U Blei Ula ai ha ki, kumno ki pynleit ïa la ka por ? Kiba bun na ki samla jong ngi ki pynlut por shibun eh tang ha ki jingsngewbha bad kumta ter ter. Ki Phareng naduh Bilat ki wan thung sla – sha shaduh shane bad ka jingjngai kaba da ki hajar mail. Ka jinglut ka long kaba jur, hynrei ki pynlong kam ïa kata namar ba ki iohi ïa ka spah ka ban wan sha ka ri jongngi.
Ki wad lad bad ki thom ïa ki jingeh bad kumta ki jop bad ka ri jong ki ka roi. Ki samla ka ri ba don ja-bieng bad proh jingmut, kynthei shynrang, khie thiah bad kyndit bynriew pyni sha ka pyrthei ba phi dei ki samla kiba shisha kiba thrang ba ka ri kan kiew, kiba wad lad ban kyntiew ïa la ka jaidbynriew, hynrei ym dei kiba wad lad tang ïa ka jingsngewbha bad pynhiar dor ïa la ka jaidbynriew.
