Agartala, Nailar:
Hadien ka jingleit jngoh ïa ka thaiñ Chandipur-Srirampur kaba don ha Unakoti distrik, u Myntri Rangbah jong ka Tripura u Manik Saha u la pyntikna ban pynbiang ïa baroh ki jingdonkam ha kaba ïadei bad ka jingpynbha ïa ka jing-ker ha ka bynta khappud India-Bangladesh kaba la julor na ka daw ka jingwan jong u slap, la ïathuh ka tyllong khubor.
Shuh shuh la ïathuh ba katkum ka jingthoh ba la phah, u Myntri Rangbah ha ka jingleit jngoh jong u ha ka sngi Saitjaiñ sha ka thaiñ khappud, u la ïakren bad ki nongshong shnong ka thaiñ bad u la sngap thuh ïa ki jingeh ba ki la pynpaw ha u.
Ki nongshong shnong ki la ïathuh ba katei ka jingker ha ki bynta khappud kan sa ap jingma khamtam na ki nongkhaïi tuh, ka jingwan rungtuh ki bar ri, ki nongtuh masi bad kiwei pat ki kam sniew lada ym lah ban pynkhloi ha ka ban ker noh ïa ka.
U Myntri Rangbah u la ong ba ïa kane ka mat yn sa buh hakhmat eh ban ïakren na ka bynta ka jingpyntreikam halor kane ka bynta bad ka sorkar kmie.
