Ohio Nailar 27
San ngut ki dkhot jong kawei ka longïing, kiba kynthup ïa lai ngut ki khynnah la shem ba ki la ïap ha kawei ka ïing ha Ohio ha ka janmiet jong ka Sngi Palei. Katkum ka kyrwoh khubor, na ka liang ki pulit ki kam ba ka dei ka jingïakynad shi ïing kaba lam sha jingjia ba shyrkhei.
Na ka liang ki pulit ba tohkit ïa katei ka jingjia ki suba ba kadei ka jingdkhat hi ïa la ka jingim, la ong NBC News.
Katkum ka jingthoh na ka Uniontown Police Department la ong ba kitei metïap jong ka longïing Dunham, ka kynthup ïa u Jason 46 snem ka rta, Melissa 42 snem, bad ki khun ki long ka Renee 15 snem ka rta, Amber 12 snem, bad ka Evan 9 snem la shem na ïing jong ki najan ka pung Township kaba don kumba 15 mer shabar ka Akron.
Na ka liang ka lad pathai USA Today, u Harry Campbell uba u khliehduh nongtohkit jong ka Stark County Coroner’s Office u la lah ban ithuh halor kitei kiba ïap. Tangba kat haduh mynta ki pulit kim pat shai mano ba suba ba donkti ban siat ïap. Nalor nangta, ki pulit ki ngeit skhem ruh bym don mano mano ki briew kiba donbynta ha katei ka jingjia.
Kane ka jingjia ka la pynshujer ïa ki paramarjan, nongïalam skul bad kiwei kiba don jingithuh bad kane ka longïing.
Shuh shuh na ka liang ki pulit ki la ong ba ki dkhot jong kane ka longïing ki ïap dei na ka jingshah siat ïap bunsien da ka pistol.
Katkum ka Uniontown Police lyngba u Chief Michael Batchik haba kren ha ka USA Today,” Na ka liang jong nga, kane ka dei kawei na ki jingjia ba shyrkhei ba nga shem ha ki 23 snem ha ka law enforcement, bad nga la pynlut baroh 23 snem hangne ha Uniontown.”
