Tehran, Nailur:
Ha ka jingkren kaba nyngkong eh jong u ha ka dorbar bah jong ka United Nations naduh ba ka Washington bad ka Tel Aviv ki la sdang ïa ka thma pyrshah ïa ka Tehran, u President ka Iran u Masoud Pezeshkian ha ka Sngi Balang, u la ong ba ki briew jong u ki la long ‘ki nongshah pyndik ha ki kam lehnoh’ ha ka ri America.
Haba ai jingkren ha ka UNGA, u la rah ïa ki dur jong u Supreme Leader barim jong ka Iran, u Ayatollah Ali Khamenei ba ka US ka la pynïap ha ka sngi nyngkong jong ka thma, kata ka 28 tarik u Rymphang bad ïa ki 150 ngut ki khynnah skul kiba la shah pynïap ha ka jinghiar thma jong ka US.
Utei u nongïalam uba la 71 snem ka rta u la ong ba ka Iran ka la ïada tang ïalade da ka “jingkhlain kaba khraw tam” haba ka US bad ka Israel ki la hiar thma ïa ki.
Haba pynmih da ka sur kaba pyrshah, u Pezeshkian u la ong ba u president jong ka US, u Donald Trump, u dei ban tip ba ka jingpyrshah jong ka Iran, kan nang kiew, katba ka America, ka nang pynjur ïa ki jingpynjari kyndon, jingpynbor bad “jingleh be-ijot”.
U Pezeshkian u la ban jur ba ka Tehran kan nym ailad ïa ka Strait of Hormuz, kaba ka la shah khang khyrdep man ka por naduh ba sdang ka thma kaba la pynlong ïa ka dor jong ka bor ding ha ka pyrthei ban kiew, ban pyndonkam na ka bynta ban thombor pyrshah ïa ka ri jong u.
“Ngim lah ban ailad ïa ki katto katne ban ioh lad laitluid bad ban pynskhem ïa ki jingmyntoi jong ki na ka lynti um, katba ha kajuh ka por ngi pyndonkam ïa kata ka lynti um ban pynbor ïa ka jingleh donbor jong ki halor jong ngi,” u la ong.
Haba u nongïalam jong ka Iran u dang ai jingkren, tang uwei u nongmihkhmat jong ka US uba don ha katei ka kamra u la mih noh na ka jingïalang bah jong ka UN.
Ha ka sngi thohdieng, U Trump, ula iathuh ha ka UN, ba u dang bishar bniah la un “pynduh pyndam noh” ïa ka Iran, hynrei u la iaid shakhmat ban iaroh ïa ka jingiakren kaba thymmai hapdeng ka Tehran bad ki nongiakren jong ka Washington.
