Kyiv, Nailur:
U President ka Ukraine, U Volodymyr Zelenskiy, ha kane ka kynti, u la pynpaw ka jingsngewkhïa ba ka Russïa, ka dang thmu ban thombor thymmai ïa ka ri jongu, ha ka jing kynthoh, kaba la pynmih ha ka Sngi Ba-ar.
U Zelenskiy, haba thoh ha ka Telegram, halor ka jingïakynduh jongu bad u Andy Burnham, Myntri Rangbah duh jong ka Britain, ha ki bynta jong ka jingïalang jong ka UN General Assembly, ula ong ba ka Ukraine, ka don ha ka jingïakren kaba man ka por bad ki paralok jong ka, halor ka jingpynskhem ïa ki lad jingïada ba thymmai ban ïakhun pyrshah ïa ki liengsuiñ.
“Ka don ka jingtip mynta hi ba ka Russïa ka dang pynkhreh ïa ka jinghïar thma kaba thymmai kaba heh pyrshah ïa ka Ukraine”, la thoh u Zelenskiy.
U la ong ba kam lah ban don kano kano ka jingïakren ban pynjem ïa ki jingpynjari kyndon pyrshah ïa ka Russïa “haba ki nong Ukraine ki im man ka sngi hapoh ka jingma jong ki namding bad ki drone”.
Ki shipai Russïa ki la pynmih slem bha ïa ki jinghïar thma kiba heh ha ka shi miet da ki drone bad ki namding hynrei ki la pynkylla ïa ki buit ha kine ki taiew ba la dep, da kaba pynbthei ïa ki jingbthei beit ha baroh shisngi.
Ka Moscow ruh ha kine ki bnai ba la dep ka la pyndonkam ïa ki drone kiba pyndonkam da ka bor jet, kiba her ha ki jaka kiba kham jrong bad ki phet krad na ki jingïada suiñbneng, kaba pynthut ïa ki kam khaii, ka sorkar bad ka jingim ba man ka sngi ha ka jingheh kaba kham heh ban ïa kaba mynshuwa ha ka thma kaba la neh 4 snem shiteng.
Katba u Zelenskiy u dang don ha New York, u la ïakren ïa ki jingpyrshang ban pynkut noh ïa ka thma bad u President U.S.
Ki shipai Russïa ki ïaid shaphrang suki suki lyngba ka thaiñ Donetsk jong ka Ukraine ba shatei hynrei ka lain ba shakhmat kam shym la don ka jingkylla kaba khraw ha ki bun bnai. Mynta ki shipai Ukraine ki hïar thma na suiñ ïa ki thong jong ka Russïa, kiba bun ki don ha ka kam shna umphnïang, ha ki jaka kiba jngai haduh 3,000 km (1,800 mail) na u pud u sam jong ka Ukraine.
Ha ka jingkylli jingkylli ha New York da ka Wall Street Journal, u Zelenskiy u la ong ba u president ka Russïa, u Vladimir Putin, um shym la jop ne rem ha ka thma, hynrei um shym la sngew donkam ban pynlong ïa ka jingïakren beit beit halor ka jingpynkut noh ïa ka jingïaleh.
