Paris, Nailur:
U President ka France, u Emmanuel Macron, ha ka Sngi U Blei, u la kyrshan ïa ka jingtyrwa ba ka Canada kan long ka dkhot ba nyngkong eh jong ka European Union, katba ma u bad u Myntri Rangbahduh jong ka Canada, u Mark Carney, ki dang ïaid shakhmat ban pynjanai biang ïa ka jingïadei ba kongsan ha ki liang bapher.
Ki nongïalam ki la ïakynduh ha Saint-Pierre-et-Miquelon, ka jaka jong ka France kaba don tang hajan ka rud duriaw jong ka Newfoundland ha kaba ka France bad ka Canada ki ïa-khlad tang da ki katto katne kilomitar (mile) – ka jaka kaba phylla na ka bynta ka jingkylla stet jong ka Canada sha Europe katba ka jingïadei bad ka America ka nang sniew.
“Ngi kyrshan bha ïa kata ka mat jong ka jingïadei kaba kham jan bad ka European Union, kum u dkhot ba ïatreilang jong ka Union, kumba la ong u President, bad kum u dkhot ba pura jong ka imlang sahlang jong ka Europe,” ong u Macron ha ka ktien Phareng katba u dang ieng hajan u Carney. “Ka Canada bad ka France ki shu iakhlad tang da ki katto- katne kilomitar, ” la ong u Carney ha ka ktien Phareng.
U Carney u la ong ba ki ri kin ai kam ïa ki tnat suiñbneng bad ki tnat ïada ri jong ki ban pynroi bad ïasam ïa ki jingdonkam, kynthup ïa ki kor pynher liengsuiñ bad ki jaka pdiang sngewbha kiba don ha madan. Ki la mynjur ruh ban pyniar ïa ka jingiatreilang ha ka liang ka bor ding, ka telecommunication, ka jinglah ban ialeh pyrshah ïa ka jingkylla ka suinbneng bad ka roi ka par.
Kane ka jingkyrshan jong u Macron ka wan hadien katto katne sngi ba ka President jong ka European Commission ka Ursula Von der Leyen ka la tyrwa ban pynlong ïa ka Canada kum ka dkhot ba nyngkong jong ka EU. U Carney u la pdiang ïa ka jingkyrmen bad u la kynthoh ba ka jingiadei kaba kham jylliew bad ka Europe kan ai ïa ka Canada kham bun ki lad ki lynti bad kan pynlong ïa ka ban kham duna ka jingshah pynbor ha ka ioh ka kot da kano kano ka ri.
Ki jingsiew khajna jong u Trump, ki jingdawa ban ai jingbit ha ka liang ka ioh ka kot bad ka jingkren ba man ka por ban pynlong ïa ka Canada kum ka jylla ba 51 jong ka US ka la pynsted ïa kata ka jingkylla sha ka Europe.
U Trump dang shen ruh u la pynmih ïa ka map ha ki social media kaba la pyndeng ïa ka lama U.S. ha kylleng ka North America, kynthup ïa ka Canada bad ka Saint-Pierre-et-Miquelon.
U Macron, u la pdiang burom ïa u Carney, ha ka Sngi U Blei, ha ka kad liengsuiñ ha Saint-Pierre-et-Miquelon, kaba dei ka jaka jong ka France, kaba don kumba 5,800 ngut ki briew, tang hajan ki rud duriaw jong ka Newfoundland.
U Macron u la ong ruh ba ka jingïakren jong ka Sngi U Blei ka dei shi bynta jong ki jingpyrshang kiba kham jylliew ban ïarap ïa ka France ban ïoh ïa ka umphniang bad ka gas namar ba ka thma Iran ka pynthut ïa ki ïew bor ding ha ka pyrthei bad ka pynmih ïa ka jingtieng ïa ka jingkiew dor jong ka umphniang bad kiwei kiwei ki mar ba kongsan.
“Ka Canada ka dei ka ri kaba don ïa ki marpoh khyndew kiba kongsan bad ki marpoh khyndew kiba duna. Ka dei ruh ka ri kaba pynmih umphniang bad umphniang ba kongsan,” ong u Macron. “Kaei kaba ngi kwah ban leh ka long ban pynkut ïa ki jingiateh ban ioh ïa ka umphniang ba kham bun kaba lah ban phah sha ki rud duriaw Atlantic jong ka Europe.”
Ki nongïalam ki la ïakren halor ki kam ai suiñbneng, ka bor ding, ki marpoh khyndew ba kongsan bad ki kor ki bor kiba kham stad kum ka quantum computing, ki satellite bad ki supercomputing, ong ka kyrwoh na ka ophis jong u Carney.
U Carney u la leit phai biang sha Ottawa ha ka sngi U Blei ban ïakynduh ïa u Myntri Rangbahduh jong ka Norway, u Jonas Gahr Store na ka bynta ban ïakren halor ka kam ïada ri, ka jingïada ïa ka Arctic, ka bor ding, ki marpoh khyndew ba kongsan bad ki buit thymmai kiba dang mih shwa ba un leit sha New York ha ka sngi Nyngkong na ka bynta ka jingïalang jong ka UN General Assembly.
