Jerusalem, Nailur:
U Benjamin Netanyahu, u Myntri rangbah duh jong ka Israel, uba la iakynduh jingeh ha ka liang ka jingiakhun ilekshon ha la ka jong ka jong ka ri, u la ai ïa ka jingkren kaba shyrkhei ha ka UN ha ka Sngi Palei kaba la pynrah shkor ïa ki nongshun bad ki paralok kumjuh bad kaba la pynkhih wn ruh ïa ka ïing dorbar baroh kawei ha katei ka sngi.
Da ka jing-angnud ban ioh ba un iai neh ha ka bor hadien ka ilekshon ka ban long ha u Risaw u ban sa wan, u Netanyahu u la pyndonkam ïa ka rynsan pyrthei ha ka jingïalang jong ka UN General Assembly ban kynthah ïa baroh naduh ki nongïalam ka Iran haduh u Mayor Muslim ba nyngkong eh jong ka New York bad ki paralok ka Britain, France bad Turkey.
Da ki phew ngut ki nonglam khubor na kylleng ka pyrthei ki la mih noh, katto katne ki la rkhie bein bad ki la pyrta shla, katba ka kynhun jong u Netanyahu hi ka la ieng bad ïa risa, bad u nongkren jong ka jingialang u la pyrta ban ioh ïa ka jingpynbeit.
U la kynthoh ïa u Mayor ba pawnam jong ka nongbah New York, u Zohran Mamdani, kum u “jingpyrshah ïa ki Jiw” bad u la ong ruh ba naduh ba la jied ïa u kum u Mayor jong katei ka nongbah, bun ki paidbah nong Jiw kim sngew don jingshngaiñ shuh.”
Na ka liang u Mamdani ruh, u la byrngem ban pyntreikam ïa ka hukum jong ka ICC ban phah kem ïa u Netanyahu shwa ba un kam ba um don ïa ka bor.
Ka International Criminal Court (ICC) kaba don ha Hague, ka la ong ba ha u snem 2024, ka don ïa ki nongrim kiba biang ban ngeit ba u Netanyahu, u dei uba donkti ha ki kam runar ha ka thma, ha ka jingïakhih ha Gaza, kaba la jubab ïa ki jingthombor ba la pyniap briew jong ka Hamas, ha ka 7 tarik u Risaw, 2023. U Netanyahu u kyntait ïa ki jingkynnoh jong ka ICC.
Kaba pynjur ïa ka jingeh, da ki phew ngut ki nongiakhih, katto katne ki pynher ïa ki lama “sangeh noh ïa ka jingpyniap pathar”, ki la ïa lum lang hajan ka UN. Katto katne ngut ki nongïakhih ki la shah kem, kynthup ïa ka aktor khlur jong ka Hollywood, ka Susan Sarandon.
Uwei na ki nongkynthoh ba tyngeh jong u Netanyahu, u President ka Palestine, U Mahmoud Abbas, um shym la lah satia ban leit sha katei ka jingialang jong ka UN, hadien ba ka sorkar Trump, ka la kyntait ïa u ban ai Visa.
Ha ka khubor video ba la pyni ha shwa ka jingkren jong u Netanyahu, u Abbas u la ong, “Ngi kyntait ïa kine ki lad pynshitom be-aiñ, bad ngi kyntait ïa ki jingkynnoh bad ki jingpynshisha kiba la pynshong nongrim ïa ki.”
Ka ri Bilat bad ka France, ki paralok histori jong ka Israel kiba la nang kren shai ha ka jingkynthoh jong ki, ki la don ruh ha ka lain siat jong u Netanyahu.
