Ottawa, Nailur:
U Myntri Rangbah duh jong ka Canada, u Mark Carney, ha ka Sngi Ba-ar u la ong ba ka jingïakren khaii pateng bad ka Indïa ka la jan long kaba jop bad ba kine ki ar tylli ki ri ki thmu ban pynkut noh ïa ka jingïakren hapoh ka jingïalang jong ka G20 ha ka shiteng jong u bnai December.
U Carney u la ong ruh ba ka Indïa, katkum ka jingsngewthuh jong u, ka la pyntikna ba u Narendra Modi, u Myntri Rangbahduh jong ka ri Indïa, un sa leit beit khlem jing artatien sha Canada watla ym pat lah ban pyntikna ïa ka tarik halor kane.
“Ngi ïaid shaphrang bha ha ka jingïakren khaii pateng jong ngi bad ka Indïa”, la ong u Carney ha ka jingïalang bad ki nongthoh khubor ha shilynter ka UN General Assembly.
U Carney u la ong ba ma u bad u Modi ki la kular ban pyrshang ban pynkut ïa ki jingïakren da ka G20. Kane ka jingïalang ka long ha ka 14-15 tarik u December ha Trump National Doral ha Mïami.
U Carney u kwah ban pynkiew ar shah ïa ka khaii pateng jong ka Canada sha ki ri bym dei jong ka US ha kine ki phew snem ban wan bad u la pynlong ïa ka Indïa kum shi bynta jong ka jingpyrshang kaba kham heh ban pynduna ïa ka jingshanïah jong ka ri ha ka America katba ka jingïadei ka nang sniew ha ka jingsynshar jong u President Donald Trump.
Ha ka taiew ba ladep, u Carney u la pdïang ïa ka jingkyrmen ba ka Canada kan long ka dkhot ba nyngkong eh jong ka European Union, da kaba ong ba ka jingïadei kaba kham jylliew bad ka Europe kan ïarap ban pynthikna ba ym don kano kano ka ri kaba lah ban synshar ïa ki iew jong ka Canada lane ban pynduh ïa ka jingsynshar jong ka.
U Carney u la ïateh ruh bad ka China ha kaba sdang jong une u snem ban ailad ïa ki kali elektrik kiba rit jong ka China ban rung sha Canada ha ka dor kaba la pynduna bha kum ka jingsiew kyllïang ïa ka China ban pynhïar ïa ka dor jong u soh Canola jong ka Canada.
Ka Canada bad ka Indïa ki la sdang thikna ïa ka jingïakren halor ka jingïateh kular khaii pateng ha u Risaw, ha kaba baroh ar tylli ki sorkar ki la kular ban pynkut ïa ka jingïakren ha kaba kut jong u snem 2026.
Kane ka jingïajan sted ha ka lïang ka ïoh ka kot ka long hadien ka jingïapher jingmut kaba jur ha ka jingïadei halor ka jingshah pynïap ha u snem 2023 ïa u nongïakhih Sikh na Canada u Hardeep Singh Nijjar ha British Columbïa. U Myntri Rangbahduh barim u Justin Trudeau u la ong ba ki don ki jingkynnoh kiba lah ban ngeit kiba pynïadei ïa ki agent jong ka sorkar Indïa bad ka jingshah pynïap jong u Nijjar.
Ka Royal Canadïan Mounted Police hadien ka la ong ba ka don ïa ki sabut ba la kynnoh ba ki don ka jingïadei bad ki agent jong ka sorkar Indïa bad ki kam pynïap briew bad kiwei kiwei ki kam thombor ha Canada. U Trudeau u la ong ba ki nongmihkhmat jong ka ri Indïa ki la lum ïa ki jingtip shaphang ki nong Canada kiba la pynphai sha ki kam runar ba la pynbeit ryntih bad kaba la wanrah ïa ka jingkulmar. Ka Canada ka la beh noh ïa 6 ngut ki nongmihkhmat jong ka ri Indïa hapdeng kitei ki jingkynnoh. Ka Indïa ka la kyntait ba ka la donkti bad ka la kynnoh ba ka Canada ka ai jaka rieh ïa ki nongïapher Sikh.
U Carney u la ïaid stet ban tei pat ïa ki jingïadei. Ka jingwan jngoh jong u sha Indïa ha kaba sdang jong une u snem ka dei ka jingwan jngoh kaba nyngkong eh jong u myntri rangbahduh jong ka Canada naduh u snem 2018.
