U CEM thymmai
Ha ka 28 tarik jong u bnai ba la dep(kata 28 tarik u Rymphang 1963), la jied ïa u CEM bad kumta la jied ïa u Bah Edwin Bareh kum u CEM. U la ioh 12 tylli ki vote bad u Bah Hadem u la ioh 11 tylli ki vote. Kumta u Chairman jong ka District Council ha ka jingpynïaid ba stad jong u, u la pynbna (declare) ïa u Bah Edwin Bareh kum u CEM.
Baroh ngi ithuh ïa u Bah Bareh uba la long u Executive Member ha ka Executive Committee jong i Bah Cajee bad uba la ju ïai long ruh u samla uba shit rhem bha ïa ka ïaleh Hill State bad u la long ruh u briew uba lah ban trei shitom kumba la ju iohi baroh shi katta. Une u samla u la trei, shwa ba un ïa shim bynta ha ka saiñ pyrthei, ïa ka kam shipai bad u la poi kylleng ka pyrthei. U la trei ruh shipor ha office Jowai bad u la resain noh ïa la ka kam namar ka jingkhot ka ri. U la sngewdei ban iehnoh ïa la ka spah ka hajar, ïa la ka ïing ka sem, ïa ka baden ka pynthor ban shakri ïa ka ri. Ka jingkit jong u mynta ka kynti kum u CEM kan long kaba khia shibun eh bad bad ka lynti jong u kam dei kaba la siang da ki tiew kulab, hynrei da ki shiah kiban thar pynmih snam. Mynta ka kynti kan shong shibun ha ka jingnang bad jingstad jong u kumno ban shakri bha ïa la ka party bad ïadei lok bha bad kiwei pat ki dkhot jong ka District Council. Don shibun ruh ki jingeh bad jingduna ha ka ri, u paidbah bad ka pyrthei kin peit bha ïa u kumno un pharia (tackle)ïa kita ki jingeh kiba ka ri ka don hakhmat jong ka.
Ka District Council ka dei ka tynrai jong ka jingsynshar ha ka ri jong ngi bad lada ïa ka ym lah ban pynïaid bha bad ha ka rukom kaba dei, ka jingshah jingïathuh khana kan don bad dei ma ngi hi u para ri u ban duhnong shibun eh.
Ngi phah ïa ka jingkyrkhu jong ngi sha une u samla ba kumba u la pdiang ïa kane ka lyngkor kaba khia shibun eh, un lah ban pyndep hok bad ban kit na ka bynta ka burom ka ri bad ka jingmyntoi u paidbah.
[ U NONGSAIÑ HIMA (02 tarik ïaïong, 1963)]
