Bertina Lyngdoh
Katkum ki khana ki Greek Mythology, la ong ba ha ki por hyndai mynshuwa, mynba ka pyrthei ka dang lung dang hok, ki briew ki hok, ki khuid ki suba, bad ba ki lait na ka jingpang lane bym don ki jait jingpang. Ki long ruh kiba sngur ha ka mynsiem, ha ki kam kiba paw shabar, kiba khuid ha ka ktien ka thylliej, ki don ïa ka jingïatylli lang, kam don ka sang ka ma, bad ki long kiba koit ba khiah. Dei ynda hadien ba ka Pandora ka la tam ïa ka hukum u Zeus ba kam dei ban plie ïa ka synduk rit kaba la ai sngewbha ha ka da u Zeus bad ïa kaba la ohshrong bad pynwandur bha ka jingitynnad jong ka. ïa kane ka synduk la ai kyrteng da ka Pandora’s Box na i jingïathuhkhana lyngkot ki Greek Mythology bad ïa kaba don ïa ka jingmut bad jingsneng ha ka.
Man la ki jingjia ki jia, namarba don hi ki jingbakla, ba leh tam bad ba ïaid lait. Bun ki jingjia haba ki la jia, khamtam ki jingjia basniew, ka kham shitom ban kylla bha biang. Kumta keiñ, ba naduh ba ka Pandora ka plie ïa kata ka synduk ai sngewbha ki sa mih keiñ ka jingsniew ka pyrthei ka pang ka shitom ïa ka bym lah shuh ban pynbha. Katkum ka khana, la ong ba ha kane ka synduk la dap bad la syrtok ïa ka, da ki jingsniew ka pyrthei. Kano kano ka tiar ïa kaba la sop bad spaiñ bha khamtam haba don ba ai sngewbha ïangi, khlem pep ngin kwah ban tip kaei kaba don ha ka bad kaei kata. Kumjuh ruh ka la jia ïa ka Pandora, hadien ba ka la iohpdiang ïa kata ka jingaisngewbha na u Zeus, ka kwah dik-dik ban tip kaei kaba don ha ka synduk rit. Kumta, ka la plie bad baroh ki jingpang jingkhuslai ki jingbishni, jingpynshoi, ka tharai sniew, ki kam awria ki la mih lut bad saphriang kylleng ka pyrthei bad ba briew u ioh ring mynsiem ïa ki. Na baroh ki jingsniew kiba mih na kane ka synduk lehse ka ba kham sniew ka dei kata kaba ngi ong ka ‘Shun Thlong Mluh Thlong Sying. Kane ka mut ka jingshun ne ka jingisih ïa kaba ym lah shuh ban ïa bha ne ban ïa mab. Kane ka thew ïa ki jing-leh ki bymlah ban pdiang kiba pynsngewsih kthang ne pynmong ïa ka mynsiem. Nalor ki jingleh kiba long kum ki nongshun, ki nongshun ki lah ruh ban long lyng-ba ka ktien ka thylliej, bad ka jingpeit isih ne khngieng ki khmat. Shisien ba la long kita ki shun thlong mluh thlong sying, don ka por lei ba wat ïa ka sur kren jong ki ruh ym kwah shuh ban sngew lane wat ban ïalap ïa ka kyrteng jong ki. Ka mluh ka kthang, U sying u sat, kumne keiñ ka jingisih ne jingshun ruh ka long. Kumjuh ruh lada u Kurat u long u nongshun u Tala, kumjuh ruh kine ki dei ki tiar kiba lah ban pynïasyrïem bad ka jingim hapdeng u briew u ba don ha ka jingshun.
Kumta, la dei te ban kynnoh ba dei namar ka Pandora ki roi bad kynrei ka jingsniew kum ka jing ïashun ïap bad kiwei kiwei de. La katta ruh, ngim lah ban pynïabha jubor ïano ïano ruh bad ba kam long ruh kaba bha ban pynïashun hapdeng u bynriew. Ai ba ka jingsngewthuh kan wan hi ba por te ka batai ïa ka jing-bha ban wan phai. To ngin pyrshang ban im bad ban ieit ïa ki nongshun jongngi kata katkum na ka ktien u blei.
