Baghdad, Nailar:
Ha kane ka kynti, la ong ba ka Iraq ka la sdien phasi ia 3 ngut kiba don kti ha ka kam pynbthei bom ha u snem 2016, kaba la shim ia ka jingim jong palat 320 ngut ki briew hapoh Baghdad. Ia katei ka kam pyntriem la shim jingkit khlieh da ka kynhun lehnoh ISIS.
Katei ka jingjia bthei bom ka long kaba shyrkhei tam ba ka ri ka la ioh mad hadien jong ka jingbthei bom kaba jur ha ka 11 tarik u Nailur jong u snem 2001 kaba la jia hapoh United States.
Ha ka 3 tarik u Naitung jong u snem 2016, la ong ba 323 ngut ki briew ki la duh noh ia la ka jingim ha ka jingleit pynbthei bom jong ki dkhot ka kynhun lehnoh ISIS hapoh ka thaiñ Karrada jong ka Baghdad, katba ki paidbah ki dang iabeh ban leit sha ka jingleh niam ‘Eid al-Fitr’ kaba long ka jingpynkut ia ka jingleh niam ki Muslim ha utei u bnai jong ka Ramadan.
U Myntri Rangbahduh ka Iraq, u Shia al-Sudani, haba ai jingkren sha ki lad pathai khubor bad sha ki bahaiing- hasem jong kitei kiba khlad baroh, u la pynbna ba ka ïingbishar ha kane ka kynti ka la shim ia ka rai ban ai da ka jing pynshitom kaba khraw ia kitei kiba don kti ha katei ka kam thombor ha katei ka jingjia ha u snem 2016 bad ka jingsdien phasi ia kitei ki 3 ngut ha katei ka sngi ka long ka dak jong ka hok ba la pynïoh naka bynta jong kito kiba khlad baroh ha utei u snem.
Katei ka jingbthei bom ha utei u snem, ka long ka jingjia kaba shyrkhei tam ba ka Iraq ka la ioh mad ha katei ka por.
