![Shah kem u briew ba pynïap ïa ka paralok ha US US](https://unongsainhima.com/wp-content/uploads/2023/08/US-720x413.jpg)
Washington, Nailar:
Ha kane ka jingjia, la ong ba ki pulit jong ka United States ki la shem ia kawei ka briew ba la ithuh kum ka Danicka Bergeson, 33 snem ka rta, napoh ka jaka sah jongka ha Hopkins ha une u bnai ba la lah, tang hadien kumba 11 sngi ba la pyllait ia u samla jongka na patok. Utei u briew uba ka don jingiadei ha ki por ba la leit, u dei uba ju leh donbor bad pyni bor ia ka.
Katkum ka ejahar ba la ioh jing ujor ha ka Sngi Balang jong ka taiew ba la leit, la ong ba u trai jong katei ka ïingmala ba katei ka briew ka sah wai, ha katei ka por u ïohsngew ia ka sur jong katei ka samla ba ka hylla, ka lynñiar bad ka don ruh ka sur kaba long kumba shah tied ne shah sangah ha ka kynroh iing. Ha katei ka ejahar, ki pulit ki la jer kyrteng ia u samla jong katei ka briew- u Mathew Scott Brenneman, uba long u suba don kti ha katei ka jingpyniap ia ka namar dei tang ma u hi uba lah ban leit rung bad leit leh trai hapoh ka jaka sah jongka.
Ki pulit ki iathuh ba ha katei ka jingleit poi jongki ha katei ka iingsah jongka, ki lap ia ka met jong ka Bergeson napoh jong kawei ka nep kaba la kyllaiñ bad sop bha ia ka. Kumjuh ruh la shem ia utei u samla jongka uba la don 39 snem ka rta bad la lap ia u ha ka kamra sum jong ka.
Hadien ka jingiap jong ka Bergeson, u kpa jongka, u David Bergeson u la iathuh ba ka Danicka Bergeson ka long ka briew kaba iaid beit bad im hok bad kam ju don kano- kano ka jingiakajia badno- badno ruh ha ki por ba la leit ha ka jingim jongka namar kam dei ka briew kaba kwah ban pynmih daw sniew ne ban iashun badno- badno ruh.
La ong ba utei u briew u la shoh bad pynmynsaw ruh ia ka Bergeson ha u Iaiong ha ka por ba u iakajia badka ha kitei ki por.
Katkum ba la iathuh da ka ïingbishar na Hennepin County, u Brenneman hadien ba u la lait na ka jingshah bat hadien katei ka jingktah kti jong u ia ka, u la leit shoh bad pynmynsaw biang ia ka pat sa ha u bnai Jymmang.
Kumta, ha katei ka sien ba khatduh, la ong ba utei u briew u la ksih syndon ia ka kumba 1 minit shiteng eiei, da ka jingthmu ban shim noh syndon ia ka jingim jongka.
Haba iadei bad kane, ki pulit ki la bat bad kem noh ia u bad la pynngat ruh ia u hapoh ki kyndon pynkheiñ aiñ jong ka jingthombor bad ka jingpyniap briew namar kitei ki kam thombor kiba u la leh pyrshah ia katei ka samla.