Jerusalem, Naitung:
Ka tnat shipai Israel ha ka Sngi Balang, ka la pynbna ba ka la ioh ban ther ïa kawei ka jaka mane ki jaitbynriew Muslim kaba don hapoh nongbah Gaza, ha kaba, ka la pyntip ba katei ka jaka, ka dei kaba ki lehnoh Hamas ki pyndonkam ban buhrieh ïa ki tiar thma jongki.
Katkum ki dur ba la saphriang na katei ka nongbah ha ka Sngi Ba-ar, la iohi ïa ka dih kaba klang bad ka tdem kaba rben kaba mih na kitei ki iing dara jong ki paidbah nong Gaza kiba la shu sah khlem iing khlem sem naduh ba ki iing – ki sem bad ki shnong- ki thaw jongki ki la julor lut ha ka thma.
La lah ban iohi ïa ki nong Palestine ba ki dang iaid lyngba ki thliew ba heh jong ki thliew bad ki thliew hadien ka jingshah thombor.
Ka jingsangeh thma kaba tlot ka dang neh hapdeng ka Israel bad ka kynhun lehnoh Palestine Hamas, hynrei kam shym la pynsangeh ïa ka jingïakynad ha Gaza Strip, ha kaba 1,207 ngut ki briew ki la shah pynïap naduh ba la sdang ka jingsangeh thma ha u bnai Risaw jong u snem 2025.
Ka jingsiat ding jong ka Israel ka dang bteng ban siat beit ïa ki nong Palestine kiba ki shipai ki ong ba ki dei ki lehnoh, katba ki jingpyrshang ban ïoh ïa ka jingïateh kular kaba neh ban pynkut noh ïa ka thma ki la sahkut.
Ki dur jong ka AFP, ki pyni ba da ki phew ngut ki nong Palestine, ki la phet krad na katei ka jaka, ha shwa ba katei ka mosque, kan shah lynshop.
“Hato kane ka dei ka jingsangeh thma? Man la ka sngi ki don ki jingshah thombor, man la ka kynta, man la ka jingpynhiar mynsiem. Ki don ki jingshah thombor ha man la ki jaka. Ki byrngem bad thombor, la ka long ki kali paidbah ne kano kano kaba ki bom,” la ong u Shehadeh Badawi, uba la iohi da la ki jong ki khmat, ha ka AFP hadien ka jingjia.
U Amir Abu Al-Amrain, uba dei u director general jong ka tnat jong ka awqaf bad ki kam niam ha Gaza Strip, ula ong ba ki shipai Israel, ki la pynjot syndon ïa katei ka mosque, ha katei ka jinghiar thma liengsuiñ.
“Ka jingshah knieh ka ai da ki jingpynrem lamler – kum ka jingkynnoh ba don ki jaka shipai – ban pynshisha ïa kine ki kam runar,” u la ong, da kaba khot ban tuklar kyrkieh ban iada ïa ki mosque bad ki jaka mane Blei.
Haduh ka 24 tarik u Lber, 2026, ka UN cultural agency jong ka UNESCO ka la pynshisha ïa ka jingjulor ha ki 164 tylli ki jaka naduh ba sdang ka thma Gaza kaba la mih na ka jinghiar thma jong ka Hamas ïa ka Israel ha u Risaw 7, 2023.
Shiphew tylli na kita ki dei ki jaka niam.
