Washington, Naitung:
Ka tnat shipai jong ka America ka la pynlong ïa ki jinghiar thma ba tyngeh pyrshah ïa ka Iran kum ka jingpynshitom beiñ ïa ki jinghiar thma jong ka Tehran ïa ki ktem jong ka US ha Jordan katba ka thma Middle East ka dang khie biang bad khring biang ïa ki nongmihkhmat jong ka Islamic republic. Kine ki dei ki jingshah thombor ba nyngkong hadien ka jingsangeh kaba la jan shi taiew ha ka jingialeh, kaba la pynduh ïa kano kano ka jingkyrmen ban wanphai biang sha ka jingiakren. Ha shwa ki jinghiar thma ba dang shen, u President Trump jong ka US u la ong “Ngin ther da kaba tyngeh bad ngin pynjem khnap syndon ïa ki ha kane ka sien.”
“Ki jinghiar thma ki long kum ka jingkynthoh kaba khlain bha ïa ka jingpyrshang jong ka Iran ban hiar thma hynnin ka sngi ïa ki shipai jong ka US kiba don ha Middle East”, la ong ka US Central Command ha ka jingthoh ha ki social media.
Ha shwa ki jinghiar thma ba dang shen, u President Trump jong ka US, u la ong ha ka Fox News: “Ngin sa pynkhih jur ïa ki…Ngin sa pynliem ïa ki ‘effing s’ na ki.”
Ha kajuh ka por, ka telebishon jong ka Iran, ka la iathuh ïa ka jinghiar thma jong ka US, ha ka thain khappud Piranshahr, hadien ba ka tnat pathai khubor Fars, ka iathuh ba u namding, u la ther ïa ka jaka bym don briew, ha kaba kam shym la don kano kano ka jingmynsaw.
Kitei ki jinghiar thma jong ka America, ki dei hadien ba ka Iran, ka la siat namding, ha ka Jordan, ka ri paralok jong ka US, ha kaba ki lad pathai khubor jong ka Iran, hadien ki la iathuh ïa ka jinghiar thma jong ka America, hajan khappud jong ka Islamic republic bad ka Iraq.
