San Juan, Naitung:
katkum ki khubor, la iathuh ba kawei ka liengsuiñ ‘helicopter’ ka la leit hap bakla ha ka thaiñ San Juan jong ka ri Argentina, ha kaba 7 ngut kiba shong ha katei ka liengsuiñ ki la khlad noh syndon ha katei ka jingjia.
Katei ka liengsuiñ Bell 412, ka dei kaba ki dang dep ai jinghikai bad ka dang thmu ban leit hiar sha ka thaiñ ba marjan ban iarap pynlip ïa ka ding kaba klang, ha kaba ka la leit hap bakla noh ha kawei ka jaka shangkai pynngad hapoh Ischigualsto ha ka step Sngi Balang ha ka por kumba 10:30 ha kaba kim shym la don ba ioh iakren shuh bad ki nongñiah jong katei ka liengsuiñ.
“Da ka jingsngewsih kaba jur, ngi la ïoh pdiang ïa ka khubor jong ka jinghap ka liengsuiñ kaba la jia ha ka Jylla jong ngi, ha kaba hynñiew ngut ki briew da ka jing sniewbok ki la duh noh ïa ka jingim jongki,” la thoh u Lat ka San Juan, u Marcelo Orrego hapoh ka rynsan paidbah ‘X’. Kitei kiba khlad, ki kynthup ïa ki nongpynlip ding, ki pulit bad ki briew ka tnat ïada jong ki paidbah.
La ong ba ki tnat ba dei khmih, ki dang bud-dien halor kane ka jingjia bad ki dang tohkit bniah ruh halor ka daw jong katei ka jingjia bad la phah ïa ka kynhun ai jingïarap ban leh ïa kaba donkam haba iadei bad kane.
U Alejandra Monteoliva, u Myntri ka tnat iada ri jong ka Argentina, u la pynpaw ïa ka jingsngewlem halor katei ka jingjia hapoh ka rynsan X.
U nongthoh khubor na kane ka thaiñ bad u paralok jong uwei na kitei kiba la shah pynïap, u pulit u German Videla, u la ïathuh ha ka TN television channel ba kitei ki arngut ki la ïakynduh kumba shikynta shwa ban hap.
Ka helicopter “ka la bthei ha ki hajar tylli ki bynta. Ka long kaba sngew lyngngoh,” ong u nongthoh khubor, u Mauricio Davila, uba la iakren ruh bad ki kynhun ai jingiarap ha katei ka jaka ba ka la hap.
Ka sorkar pdeng jong ka San Juan, ka la pynbna ïa ka jingsngewsih kaba lai sngi, hadien katei ka jingjia aksiden, ha kaba yn pynher ïa ki lama jong ka ri bad jong ka jylla, ha ka shiteng mast.
Ka La Rioja, ka dei ka thain kaba rkhiang kaba heh kumba ka Austria, ka la ialeh pyrshah ïa ki katto katne ki jingpluh khlaw ha ki jaka lum naduh ba sdang jong ka taiew.
Da ki spah hectare ki jaka ki la ingkhong tang hapoh lai sngi, la iathuh ki nongpynlip ding na katei ka thain ha ka AFP.
