Shillong, Nailar 29
U KL Rahul ha ka sngi Ba-ar u la pyntip ba un duh ïashim bynta ha ki ar tylli ki jingïalehkai Asia Cup na ka daw ka jingmynsaw ha ki bynta jong ka kjat bad kane ka lah ban shimpor ba un wanphai biang sha ka jingïalehkai na ka bynta ka kynhun ïalehkai ka ri.
U coach ka kynhun ïalehkai kriket ka ri u Rahul Dravid u la ong ba ka jingmynsaw ka jong u kam don jingïadei eiei bad ka jingmynsaw ha ki bynta jong ka khohwah kaba la pynlong ïa u ban duh ïalehkai da ki bnai.
Une u rangïalehkai u la don hapoh ka kynhun ïalehkai ka ri na ka bynta katei ka lympung.
“U KL u la long uba biang biang mynta ka taiew, naduh ka rukom ïalehkai, hynrei un duh ïalehkai na ka bynta ar tylli ki jingleit ïalehkai sha Kandy,” la ong u Dravid.
U Coach u la bynrp ruh da kaba ong ba u Rahul un hap ban shong ha NCA tad haduh ban da pynbna ïa ka kynhun ha ka 4 tarik u Nailur.
“Ka NCA kan hap ban bishar thuh ïa u na ka bynta kine ki khyndiat sngi ki ban wan katba ngi dangleit bad ka kynhun. Ngin sa pynbna ïa ka kynhun ha ka 4 tarik u Nailur. Lada u la lah ban ïalehkai, u lah ban ïadon bynta lang bad ka kynhun na ka bynta ki ar tylli ki jingïalehkai,” la bynrap u Dravid.
