U Nongsaiñ Hima,1980
Ha kito ki jaka kiba ki Phareng ki la jop, ki pynrung shisyndon ïa ki aiñ khyndew ki aiñ khlaw. Don ki jingpynïaid ryntih bad ki jingmana ïa kiba ïa kiba ki nongshong shnong ne ki trai khyndew ne khlaw ki dei ban bud bad pyntreikam.Don ruh ka jingkheiñ jingdiah kaba biang bad kaba thikna bad ym don iwei i dkhot khyndew ne khlaw iba khlem hap ha ka jingkheiñ jingdiah bad ba yn ym tip ba ym don ba long trai. Kumta da kaba leh kumne ym don kano kano ka jingkulmar ne jing-ïakam kynti, ne ka jingai pata arsien ïa ka juh ka jaka ne ïa die ïa thied ïa kajuh ka khyndew ne khlaw arsien lai sien.
Lah ban ong ba ki Phareng kim shym la jop ïa kane ka ri jong ngi bad kumta ka jingpynïaid ïa ka khyndew ne ïa ka khlaw ka shu rah kumba ju long. Ki khlem da lulia ei ei ha kane ka liang. Kane ka la long ka jingkyrkhu kaba khraw ïa ka ri. Hynrei katba dang ïaid ki sngi ki snem, da ka jingdonkam bun ïa ka khyndew bad ïa ki khlaw ha ki kam pynroi pynsan, ki khyndew ki khlaw ki la kiew dor bad kumta ha kane ka ri jong ngi kumba la long sha kiwei pat ki jaka, la mih ka jingdawa kaba jur ïa ka khyndew bad ïa ki khlaw bad ka dor ka la kiew kynsan tik bad tik.
Kumta ki khmat baroh ki leit sha ki lad kumno ban ioh skut khyndew ne skut khlaw ban lah die pat ïa ki ha ka dor kaba rem ynda la donkam ka sorkar ne kiwei pat ki bynta trei kam jong ka sorkar. Ka jingmih na kane ka la long ba la mih bun ki jingiakam long trai ha ka khyndew ne ïa ki hlaw bad la mih ruh bun ki jingïaleh ïatur ha ki ïing Bishar. Kumta ha kane ka rukom la mih bun ki jingïaleh bad u ioh jong kane ka kam u long ba la lut ka spah ka hajar bad ka por kaba lut ruh ka bym kai shuh ha ka leit ka wan ban ialeh ban ïatur ha ki ïing Bishar. Mih sa ki jingïakynad ha shnong ha thaw, mih sa ki jing-ïapeit mat dong uwei ïa uwei pat bad kumta ym don shuh ka shong suk shong saiñ ha shnong ha thaw.
Ha ki por mynshuwa ym da donkam eh kata ka rukom kheiñ bad rukom buh jingkheiñ ka khyndew ne ki khlaw namar ba kine ki don kyrhai bad duna ruh u briew, hynrei mynta kam long shuh kumta u briew u la roi bad ki jingwan ki briew ha ka ri jong ngi na kylleng ka la jyllei.La dei ban don ka jingbuh jingkheiñ jingdiah ïa ka khyndew ne ïa ki khlaw ban tip thikna ïa u pud u sam bad ïa ka jinglong trai. Kane kam mut ban oh khajna hynrei ba yn don ka jingphikir ban lait na ka ïaleh ïatur ha ki ïing Bishar bad lah ban tyngkai ïa ka spah ka hajar bad ruh ban don ka suk ka saiñ ha shnong ha thaw hapoh ka ïit ka hima.La sngewdei ban kdew shuh shuh ba kum kata ka jingbuh jingkheiñ jingdiah ka dei ban long katkum ki riti dustur bad khlem da ïaid palat ïa ki.
Kumta kito kiba don ka jaka kin tip shai ba ka dei ka jong ki bad kito kiba die kiba thied kin tip ba ki die bad ki thied ïa kaei kaei kaba ym hap shuh ban ïaleh ban ïatur.Hato kane, kan ym pyllait ïa ka Ri na ki jinglut spah ha ka kiew Iinglieh Ing saw bad ki jingartatien haba la thied ïa die jaka ne khlaw bad hato kane kan ym long ka jingkyrkhu kaba khraw ïa ki briew kiba shong ha ka ?
