Port-au-Prince, Nailar:
Ka ki bor pyniaid jong ka United States hapoh Haiti ha ka Sngi Balang, ki la kyntu ia ki paidbah hapoh Caribbean ba kin mih noh na ka jaka ba ki shong hashwa ba ka jingma kaba khraw kan wan tyllep. Kane ka jingpynbna jong kitei ki bor pyniaid ka long hadien ba ka jingïakynad bad ki kynhun runar kiba don ha katei ka jaka, ka la nang jur shuh shuh bad kaba la wanrah jingma ia ki paidbah nongshong shnong kiba shong ha katei ka bynta.
Kumta, ki bor pyniaid ka United States ki la maham bad bthah ia ki nongshong shnong ka Haiti ba kin mih noh shi syndon na Haiti katba ki dang ioh lad ban mih, khnang ba kin lait na kino- kino ki jingjia ba sngewsih bad ki jingma kiba ker sawdong ia ki.
Namar la ong ba ka jingïakynad bad jingiakhun jong ki kynhun runar ha katei ka jaka, ka la nang jur bad nang heh, ha kaba ki paidbah nongshong shnong ka Haiti mynta ki la kynduh ia ki jingeh naduh ka jingkyrduh bam bad kiwei kiwei.
Ha ki khyndiat por ba la leit jong u Nailar, la pynbna ba la khang noh shwa shipor ia ka tnat Embassy jong ka United States kaba don ha ka nongbah Port-au-Prince namar ki jingjia iasiat bad ki jingïakynad ha katei ka nongbah.
