Bertina Lyngdoh
Man u briew u don la ki daw ban im, ki daw ban im bha, ki daw ban im sniew, ki daw ban sakma, kumjuh ruh ki daw ban trei shitom. Haba u im bad ki daw, ki jingkylli ruh ki bun kum ka balei, bad kaei. Ka kyntien Namar ka dei kawei ka dkhot ki daw ka jingim. Ym don uwei ruh uba lah ban im ne ïap khlem ki daw. Ka long kaba eh bha ïa man uwei pa uwei ban kiar na ki daw ka jingsniew lane ban im namar ki daw ba bha. Don ki por ha kaba ki jingjia ki jia namar ki daw ka jingbha. Ban sngewthuh ïa ki daw la ki dei kiba bha ne sniew, kaba kham pynthikna ka dei lyngba ki khmat ba iohi. Namar kine baroh, ka daw ka dei shibynta ka jingim briew ïa kaba baroh um lah lait na ka.
Kumta, kum ka paralok ka jingim, ka daw ka ïa ïaid ryngkat ryngkat lang bad ka jingim u briew. Ha ka jinglong briew, bunsien ka ju pynpyrkhat ïa u briew balei u im sngewbha bad balei u im marwei. Kane baroh ka dei namar ki daw. Kawei na ki daw, kaba ktah bha bad ba shisha ba bunsien u briew u long marwei bad ba u duna ha ka jingdon paralok dei namar ka jingduk bad ka jingduna ha ka jingnang jingstad. Lada ngi la kup ialade da ka jingnang jingstad ba pura kumta ruh ka burom ka wan bad ba ka long kawei kaba pynkren briew bha. Ka kyrteng bad ka nam u briew ka saphriang kylleng ban long ka nuksa ïa kiwei pat. Ka jingtrei shitom ruh ka dei sa kawei ka daw kaba baroh yn pur khana kylleng ba kiwei kin bud ïa ki dienjat jong ki. Ka jingnang jingstad bad jingtrei shitom ka dei ka daw ban don shibun ki lok ki jor, ki ban sngewtynnad ia u briew. Kaba sngewsih pat ka long ba briew hi u dang tlot bha ha ka jingsngewthuh bad jingshemphang jong u. Kiba bun hi ki dang sngewthuh bakla ïa kane kawei kata ka dei ka daw ka jingduk jingkordit. La stad, la sngewrit, la kyrdan u don, hynrei un ym long than uta uba kren briew, namar u duna ha ka pla tyngka. La long sa katba long ruh, haba ka pla tyngka ka duna kane kein ka dei ka dawbah ka jingshah peitpoh. Ban ia ka jingnang jingstad, jingsngewrit, ha ka pyrthei mynta, kren briew ka spah. Ban tip lei ba u dei na ka iing kaba duk, bad ba duna ha ka jing-ioh, tang katta lei kim patiaw ne pyrwa shuh. Ha man ba ki kynduh bad kum kine ki jait briew, ki khmat jong ki, ki dap sa tang da ki jingpeitpoh. Lada biang pat ha ka pisa, u long uba ha kti ha kjat jong ki. Kane ka jingshah peitpoh ka la long haduh ba ki da peit da khmih bha wat ïa ki nongbylla ba kum kano ka jait kam ka trei. Lada ki tip pat ba ki ïa ryngkatlang bad ki ha ka jingioh, ka dei kata kaba kim ju klet ban ïajuh ïajan bad ki.
Kumta, ka spah ka kren briew, ka ithuh briew, ka bun paralok, bad lehse shngain ka jingim. Lada kwah ban ïabiang lang baroh, kum ki bakhuid basuba, la dei ban pynduhnoh ïa ka jingpeitpoh namar ka jingduk. To ngin ym peit poh namar ba kim kotbor ha ka ioh ka kot. Long kiba sngewlem bad kiba tiplem bad ban ïarap lem ban pynduna ïa ka jingsngewsih ha ka jingduna ha ka ioh ka kot. To ngin pyrshang ban im katkum ka ktien u Blei kaba ong, Wat kynshew ïa ka spah pyrthei namar ba katba ki sngi khatduh ki nang jan katta ka mynsiem ruh ka nang kordit bym bha te ka jingïaid lynti ka jingim. Kumta, long kiba sngewlem ha ka mynsiem khamtam ïa kito kiba donkam ïa ka jingisynnei bad jingïarap jingkyrshan lem.
