Imphal, Nailar:
Ka kynhun jong ki shipai ka sorkar kmie bad ki pulit jong ka Manipur ki la kem ïa uwei u lehnoh shimet jong ka kynhun NSCN (IM) ha ryngkat ka 9 mm carbine bad san song ki kuli ha ka jingpyntreikam kaba la long ha Sawombung ha Imphal East distrik ha ka sngi Balang, la ïathuh ka tyllong khubor ba la wan na ki pulit.
Haba la ïoh jingtip halor kane na ki kynhun wad bniah, ka kynhun ba la ïatreilang hapdeng ka kynhun jong ka tnat shipai Assam Rifles, ka Indian Army, bad ki pulit ka Manipur, la sdang ban pynlong ïa ka jingleit khynra ha ki bynta ba bun jong ka Sawombung, kaba jngai kumba 12 km na Imphal.
Ha ka por ba la pynlong ïa ka jingkhmih bniah ha ka Checkpoint ha ka NH 202 hajan Sawombung, ka kynhun kaba la pynlong ïa ka jingleit khynra ka la kem noh ïa une u briew ha kaba hadien ba la pynlong ïa ka jingtohkit la tip ba ka kyrteng jong u ka dei u Shiningson Chilhang, uba la 45 snem ka rta, u khun jong u Mathotmi Chilhang jong ka shnong Leikoiching jong ka District Senapati ka Manipur, une u la long u dkhot ba dang treikam hapoh ka kynhun NSCN (IM).
Ïa une uba la shahkem ha ryngkat ki tiar siat la aiti sha ki pulit jong ka Lamlai Police Station, Imphal East District na ka bynta ban leh ïa kaba donkam katkum ki kyndon aiñ.
