California, Nailar:
Ha kane ka khubor la ong ba 3 ngut ki nonglute kiba rah ia ki tiar pynmynsaw kynthup ia ki tyrnem, ki la leit ban kyndang ia kawei ka dukan ba die ia ki tiar bad jingdeng ba rem dor ‘jewellery’, ha kaba kitei ki runar ki la ioh ban lute ia ki tiar kiba don ha katei ka dukan bad kiba la kot ia ka $500,000 tam bad ki la ktah kti bad pyn mynsaw ruh ia u trai jong katei ka dukan ha katei ka jingjia.
U Sam Babikian, uba long u trai jong katei ka dukan ‘Jewels on Lake’ kaba don hapoh Pasadena jong ka nongbah California, u la iathuh ba ha ka Sngi Ba-ar, ha ka por kumba 1:45 noh phai sngi, 3 ngut ki runar kiba la kah dur bha ialade, ki la siat ia u da ki kynja dawai pynsat khmat kum u sohmarit lwet bad ki la pynjulor ia ki jaka buh tiar jong katei ka dukan bad kit lut ia kat ki tiar ba ki lah ban kit ha katei ka jingleit lute jongki.
U Babikian u la iathuh ba kitei ki runar ki la ktah kti ia u ha ka por ba u dang mut ban plie ia ka jingkhang ba nakhmat jong katei ka dukan ha katei ka sngi. Kumta, tang mar ia plie ia ka jingkhang dukan, u la shah synreit da ki kynja powder sohmarit, ha kaba ki khmat, ka ryndang bad ka ktien jong u kim lah shuh ban treikam bad um lah shuh ban iohi eiei hynrei u la shu ïohsngew tang ia ka jingsawa ki jingshah pynjulor jong ki tiar bad ki jaka buh kiba don ha katei ka dukan ha ka por ba kitei ki runar ki pyn julor ia ka dukan baroh kawei ba kin ioh ban lute suk ha katei ka sngi.
Ki pulit ki la ioh jingtip ha ka por kumba 1:47 baje eiei halor katei ka jingshah lute jong ka dukan kaba don hapoh ka Block 400 jong ka Lake Avenue.
Katkum ki dur ba la shon bad pyllait da ki lad pathai khubor, la iohi ia ki jaka buh bad ki jaka wah jingdeng ha katei ka dukan kiba la sah thylli bad ym don eiei shuh bad kiba la saphriang ha madan jong katei ka dukan baroh kawei hadien ba kitei ki nonglute ki la ioh ban phet noh na katei ka jaka.
Wat hapdeng ka jingkulmar, u Babikian u la ioh ñion ia u jingñion ‘Emergency’ uba don hapoh jong katei ka dukan bad uba la riew bad pyn sawa bad phah jingtip ruh sha ki pulit halor ka jingjia ha katei ka dukan.
