New Delhi, Nailur:
Ka Treasury Secretary jong ka United States, ka Janet Yellen ka la ong ba ka United States ka la peit thuh bha haba iadei bad ka jinglong-jingman hapoh China hadien ba la iohi ia ka jinghiar jong katei ka ri ha kine ki sngi.
Namar kiba bun ruh ki ri ki la sngew sheptieng halor ka jingsdang ban hiar jong ka China bad kaba lah ban wanrah ia ka jingkiew dor ki mar- ki mata ha kiba bun ki ri lada ka jingdawa ia ki mar na China kan hiar ne duna noh.
La ong ruh ba u President ka China, u Xi Jinping un nym ioh ban iadon bynta lang ha ka jingiamir jingmut bad jingialang hapdeng ka United States bad Ka India haba iadei bad katei ka bynta kaba iadei bad ka liang ka khaïi- ka pateng.
Kumta, la ong ruh ba ka jingbym lah jong u Xi ban iadon lang ha katei ka jingialang, kan ktah jur ruh ia ka jingthmu jong ka United States ban pyniaid shakhmat ia ka jingialang G20 khamtam haba iadei bad ka liang ka khaïi- ka pateng bad ban kyntiew ia ka ioh- ka kot bad ka jinglong- jingman ha ki ri kiba la kham bit- kham biang.
Kane kan kynthup ruh naduh ka jingthmu ban pynheh ia ka World Bank & International Monetary Fund ha kito ki ri kiba la kham biang bad kiba la lah ban pynmih kham bun ki jingmyntoi.
