New Delhi, Nailur:
Ka ri India kaba la ïaid lynti palat 75 snem naduh ba ïoh jinglaitluid, mynta kan kynriah noh na ka Ïingdorbar Thawaiñ kaba rim sha ka Ïingdorbar kaba thymmai kaba ngiam haduh 1,280 ngut lada shong dorbar lang ki MP ka Lok Sabha bad Rajya Sabha hajuh.
Ka jingsdang ki MP ban leit rung sha ka Ïingdorbar Thawaiñ kaba thymmai kan sdang naduh ka Sngi Ba-ar.
Ka Ïingdorbar barim kaba la pyndep ïa ki kam bad sakhi ïa ki jingjia sahkynmaw kiba bun kynthup ka jingthaw bad jingpdiang ïa ka Riti Synshar ka ri, ka dei kaba la pyndep ban tei ha u snem 1927 ha ka por ba dang synshar ka Sorkar Phareng.
U Myntri Rangbahduh ka ri u Narendra Modi haba u ai jingkren ha Ïingdorbar Lok Sabha ha ka Lah Sngi U Blei, u la ai burom ïa uwei pa uwei u maw-it jong ka Ïingdorbar kaba rim bad u la ong ba ki MP kin rung noh sha ka Ïingdorbar kaba thymmai ha ryngkat ka jingkyrmen kaba thymmai bad jingsngewskhem.
Ïa kane ka Ïingdorbar barim yn nym pynpra satia, bad ka dei ka ïing kaba la pynwandur da u nongwan pyndur ka England, u Sir Edwin Lutyens bad Herbert Baker. Kane ka Ïingdorbar ka la sakhi ruh ïa ki jingjia kiba kongsan naduh ka jingïakhun ban ïoh laitluid ka India.
La ong ba ki don ki bynta jong ka Ïingdorbar barim yn pynkylla sha ka Museum.
Ïa ka Ïingdorbar Thawaiñ Parliament kaba thymmai la plie da u Myntri Rangbahduh ka ri, u Narendra Modi ha u Jymmang mynta u snem.
Kane ka Ïingdorbar bathymmai bad kaba heh, kan lah ban pynrung briew haduh 888 ngut ki dkhot ka Ïingdorbar Lok Sabha bad 300 ngut ki dkhot ha kamra ka Rajya Sabha. Lada shong dorbar lang ki MP ka Lok Sabha bad Rajya Sabha yn ngiam haduh 1,280 ngut ki MP ha Lok Sabha.
Kane ka Ïingdorbar kaba thymmai ka don ka jingheh kaba 64,500 square meter bad ka don lai tylli ki khyrdop kiba la ai kyrteng ka Gyan Dwar, Shakti Dwar bad Karma Dwar nalor ki jaka rung la kajong ïa ki heh ki haiñ bad ki MP.
