Taipei, Nailur:
Ka Taiwan ha ka Sngi Ba-ar ka la pyntip ba la iohi biang ia ki liengsuiñ thma bad jhad thma ka China kiba leit ban ker tawiar ia u pud u sam jong ka bad kaba long ruh ka jingma kaba khraw ia ka Taiwan naba ka lah ban shah thombor ha ka China ha kano-kano ka por bym lah tip.
Kane ka jingleit ker tawiar jong ka China ia ka Taiwan, ka long hadien ba ka la dep phah shwa da ki spah tylli tam ki liengsuiñ thma jong ka ban leit her bad leit syntiat kylleng sawdong jong ka Taiwan ha ki 24 kynta ba la leit.
Hynrei, la ong ba ha ka Sngi Ba-ar, ka tnat iada jong ka Taiwan ka la iohi biang sa 55 tylli ki liengsuiñ kiba leit her kylleng sawdong u pud- u sam jong katei ka ri dew lynnong bad kumjuh ruh 7 tylli ki jhad thma heh kiba don ha ki duriaw hajan u khappud jong katei ka ri.
Haba iadei bad kane, la ong ba ka China naduh ki por ba la leit ruh ka ju ong bad kam trai ba ka Taiwan ka long tang ka bynta ba pait bad ba shu phiah la ka jong na ka China hynrei ka dei hi beit ka bynta jong ka China bad kumjuh ruh la ong ba ka China kan sa shim biang ia katei ka dew lynnong sha lade shisien ka sngi ynda ka la sngewbit bad sngew donkam ban leh kumta.
Ha katei ka sngi, ka tnat iada jong ka Taiwan ka la kynnoh ia ka China ba ka la sdang ban pyni bor bad leit ban pynthud ia ka shongsuk- shongsaiñ hapoh jong katei ka dew lynnong.
La ong ba watla ka Taiwan ha ka Sngi Nyngkong, ka la kyntu ia ka China ba kan sangeh noh ia katei ka jingleit syntiat jongka ha kylleng- sawdong jong ka Taiwan, hynrei khlem da pynsngap ia katei ka jingkyntu, la ong ba ka China pat ha katei ka step Sngi Ba-ar kaba bud, ka la phah sa kumba 50 tam ki liengsuiñ thma bad 7 tylli ki jhad thma jongka ban leit syntiat bad ban leit ker tawiar ia ka Taiwan ha katei ka sngi.
Katba, na ka liang ka China pat, ka tnat kam bar ri jong ka China kam shym la pynpaw ne ai ktien eiei haba iadei bad kitei ki jingleit syntiat bad jingleit pahara jong ka China ha kylleng jong katei ka dew lynnong namar ka China wat haduh katei ka sngi ruh, ka kam trai beit ba katei ka dew lynnong ka long hi ka bynta jongka.
Kumjuh ruh ka China ha ki khyndiat taiew ba la leit, ka la phah ia ki shipai jongka ba kin long ba la pynkhreh hadien ba ka iohi ia 2 tylli ki jhad thma ka United States kiba leit ban iaid lyngba ia ka Taiwan Strait.
