Washington, Nailur:
Ar ngut ki kynthei na United States, ki la shah pynngat noh hapoh ki kyndon aiñ hadien ba la iohi ba ki lehkai bad kynting kai ia i khyllung rit kum kynja jinglehkai hadien ba ki la buaid habar jong ka jaka leh kmen ha Daytona Beach. Ia kitei ar ngut la ithuh kum ka Brianna Lafoe – 19 snem bad ka Sierrah Newell – 20 snem ka rta bad ki la shah kem noh hadien ba la iohi ia katei ka jingleh be- aiñ jongki ha katei ka taiew ba la lah.
Kane ka la jia ha ka Sngi Palei jong ka taiew ba la lah, hapoh Coyote Ugly Saloon kaba don ha Seabreeze Boulevard jong ka Daytona Beach.
Ki pulit ki la wad bniah noh khlem da pynslem hadien ba la ioh jingtip halor ka jingdon jong kitei ki briew kiba leh kamkai ia ka jingim i khyllung bad kaba long ka jingma kaba khraw ia itei i khyllung namar ha katei ka sngi, la ong ba kitei ki kynthei ki ia kawang kai ia itei i khyllung na jngai sha jngai bad itei i khyllung i la shu kylla lyndang- pyrdet bad her sha ka diang- sha ka mon katba sha ba shah kawang kai ha kitei ki briew ha katei ka sngi.
Ia katei ka jingjia ruh la iohi na ka dur khih ba la ring dur da kiwei pat ki nong sakhi kiba la i kynsha ia katei ka jingleh biej jong kitei ar ngut. Ha katei ka dur khih ba la ioh ring dur ruh, la iohi ia ka Ms Lafoe ba ka leit khang ia ki ba kin ym ring dur ne shon dur, ha kaba ka la leit shajan jong kitei kiba ring ha ryngkat bad itei i khyllung iba ka bat bad paring na ryndang kjat.
Ki pulit ki la iathuh ruh ba ha katei ka video la iohi ia ka Ms Lafoe ba ka kynting bad padai dusmon ia itei i khyllung da kaba bat na ki kit lane ki kjat jong-i bad kane ka lah ban ktah jur ia ka met ka phad jong itei i khyllung bad khamtam lada dei ba ym don ba ioh ban pynsangeh noh ia katei ka jingleh be-aiñ jongki ha katei ka sngi.
Ia itei i khyllung la rah noh sha ka jaka sumar kaba don hajan, ha kaba i la don ia ki dak jngem na ki bynta jong ka met bad katkum ka ‘x-ray’ ba la dep ban peit bniah ha ka sngi ba bud, la shem ba ka kti jong itei i khyllung ka la lait bad don ruh ki bynta kiba la i kumba ka shyieng kan kdiah noh syndon.
