Jowai, Nailur 22
Ka Mukhla FC ka la rung sha ka jingïakhun semi final jong ka lympung ïalehkai kaba tip kum (L) Kesilroy Pala Invitation Football Tournament 2023 ba la pynïaid da ka West Jaiñtia District Sports Association (WJDSA).
Kane ka la urlong hadien ba ka lah ban pynliem noh ïa ka Ïalong FC da 2-1 kol ha ka jingïakhun quarter final kaba la long ha madan Kiang Nangbah Stadium Ladthadlaboh, Jowai ha ka sngi Thohdieng.
Ha kane ka jingïakhun ka Mukhla ka la ïoh ban pynkhih jar nyngkong lyngba u Primrose Lamat ha ka minit kaba 20. Kane ka jingïoh ban thep kol ka la nang pynïoh mynsiem ïa ka Mukhla ba kan ïalehkai bha bad haduh kaba kut jong ka kylla step ka la tam da 1-0 kol.
Hadien kaba la bteng ïa ka jingïakhun jong ka kylla miet ba ka Ïalong FC ka la ïoh ban pynphai kylla shi kol lyngba u Roikhih Nongtdu ha ka minit kaba 56. Hadien lai minit ka Mukhla ka la ïoh biang ban thep sa shi kol lyngba u Remark Kharmalki ha ka minit kaba 59 na ka bynta ban khur syndon ïa ka jingjop.
Ka jingïakhun quarter final kaba khatduh kanlong mynta ka sngi Saitjaiñ hapdeng ka Mynsngat FC pyrshah ïa ka Salaroh FC ha ka por 2 baje janmiet.
