Tehran, Nailur:
Ki bor pyniaid ka Iran ha ka Sngi U Blei, ki la pyntip ba ki la ioh ban kem noh ïa 28 ngut ki suba don kti ha ki kam thombor jong ka kynhun lehnoh Islamic State (IS) hadien ba la lap ïa ka jingthmu jongki ban wanrah ïa ki kam thombor hapoh Iran.
Ki bor pyniaid ki la ioh jingtip ba katei ka kynhun ka la thmu ban wanrah ïa ki kam thombor jongka hapdeng ka jingkynmaw jong ki paidbah ïa ka jingdap shi snem ka jingiakhih paidbah haba iadei bad ka jingkhlad jong ka samla Mahsa Amini ha ka 16 tarik u Nailur jong u snem 2022 ba la leit.
Kumta, la ong ba kitei ki 28 ngut ki long ki dkhot jong katei ka kynhun ba ki bor pyniaid ka Iran ki la pharep ba ki ïadon bynta ha katei ka jingthmu ban thombor ïa ka nongbah Tehran ha katei ka por.
