New Delhi, Nailur:
U heh nongïalam jong ka seng All India Majlis-E-Ittehadul Muslimeen (AIMIM) u Asaduddin Owaisi ha ka sngi U Blei u la pynibor pyrshah ïa u MP jong ka seng Congress u Rahul Gandhi ban ïakhun ilekshon na Hyderabad bad ym na Wayanad ha kaba ïadei bad ka jingïakhun ïa ka ilekshon Lok Sabha.
U MP jong ka AIMIM u la ai jingkren ha ka jingïalang paidbah kaba la long ha ka Parliamentary konstitwensi jong u ha Hyderabad.
U Owaisi, kumba la ïathuh ka tyllong khubor u la ong ba ka Babri Masjid, ha Ayodhya kaba don ha Uttar Pradesh, ka dei kaba la pynpra ha ka por ba synshar ka seng Congress.
“Ngan ïakhun pyrshah ïa u nongïalam jong phi u Rahul Gandhi u ban sa ïakhun ïa ka ilekshon na Hyderabad bad ym na Wayanad. Phi lah ban kren shibun kiei kiei, wan ha ka madan ban ïakhun pyrshah bad nga. Ki briew jong ka seng Congress kin sa ong ïa shibun kiei kiei, hynrei nga la long uba la khreh… Ïa ka Babri Masjid bad ïa ka jaka mane blei jong ki Muslim ha Secretariat la pynpra ha ka por ba synshar ka seng Congress …” u la ong, la ïathuh ka tyllong khubor.
Ka seng Congress bad ka seng AIMIM ki la pynïeng khlieh ha Telangana na ka bynta ban ïakhun ilekshon bad baroh ar tylli kine ki seng ki la pynkhlaiñ ban don bynta ha ka jingïakhun na ka bynta ka ilekshon Assembly ka ban sa long ha ka jylla kham hadien jong une u snem.
Ha basdang jong une u bnai, u Rahul Gandhi ha ka por ba u la ai jingkren ha Vijayabheri Sabha kaba don ha Tukkuguda kaba ha Telangana, u la ong ba ka seng Bharatiya Janata Party, Bharat Rashtra Samithi, bad AIMIM ki la ïatylli bad ïatreilang ha Telangana bad ka seng kan sa ïakhun ïa kine baroh lai, la bynrap shuh shuh ka kaiphot.
“Ha Telangana, ka seng Congress kam shym ïakhun pyrshah ïa ka seng BRS hynrei bad ka seng BRS, BJP bad AIMIM. Ki la kam hi ba ki dei ki seng kiba ïapher kawei na kawei pat hynrei ki la ïatreilang,” la ong u Rahul Gandhi.
U MP jong ka Wayanad MP ruh u la pynshisha da kaba ong ba kam shym la don kano kano ka mukotduma jong ka kynhun CBI bad ED ka ban long pyrshah ïa u Myntri Rangbah jong ka Telangana u K Chandrashekar Rao ne u heh nongïalam jong ka seng AIMIM u Asaduddin Owaisi naduh ba u Myntri Rangbahduh u Narendra Modi u la ñiew ïa ki ba ki dei ki briew lajong.
