Kabul, Risaw:
Katkum ki khubor la ong ba palat 2,400 ngut ki briew, ki la khlad bad duh noh la ka jingim na u jumai bah uba la pynkhynñiuh ia ka Afghanistan ha ka Sngi Saitjaiñ.
Ka tnat US Geological Survey (USGS) ka la iathuh ba utei u jumai uba la pynkhynñiuh ia katei ka ri ha katei ka Sngi Saitjaiñ, la ong ba u la pynkhynñiuh ia kumba 35 Kilometre (20 Miles) na ka thaiñ Shatei-mihngi jong ka nongbah Heart, ha ka jingkhlaiñ ba 6.3 Magnitude.
Utei u jumai u long ruh uwei napdeng ki jumai ba shyrkhei tam ha ka pyrthei, hadien jong u jumai bah ba la khie hapoh Turkey bad ha Syria, ha kaba palat 50,000 ngut ki la khlad ha u Rymphang jong une u snem.
Wat la katta, la ong ba ka jingdon jong kiba khlad na utei u jumai ka lah ban nang kiew shuh shuh na ka 2,445 ba la ioh jingkheiñ ha katei ka step Sngi U Blei bad la ong ba da ki hajar ngut ruh kiba la ngat bad mynsaw ha utei u jumai ha katei ka sngi.
Kumba 1,320 tylli ki iing briew kiba la julor bad twa ha utei u jumai, ha kaba ka jingdon kiba khlad ruh ka la kiew bun na ka 500 ngut ba la pynbna da ki lad pathai khubor hadien ki khyndiat kynta ba la dep khñiuh utei u jumai ha katei ka sngi.
Kumta, la ong ba ki jingdonkam ba man ka sngi kum ka um ding, ki jingbam, ki dawai, ki jaiñ ki nep bad ki iing dara ban thiah, ki long kiba donkam hakhmat eh khnang ba ki paidbah kin ioh ban sah rieh tngen shipor katba ka sorkar kam pat lah ban ai ia ki jingiarap ba kham biang naka bynta jongki.
Ki don kumba 200 tam ki jaka sumar paidbah hapoh ka nongbah Heart. Hynrei kiba bun ki long kiba dang rit bad ki bym pat biang.
Shuh shuh ruh la ong ba katba ka jingwad bad jingleit iarap jong ki kynhun iarap ka dang iaid shakhmat, ka jingdon kiba khlad bad mynsaw ruh ka dang lah ban kiew bad ym pat lah ruh ban pynithuh lut ia baroh kiba la ngat ha utei u jumai tat haduh ban da ioh ban pyndep ia ki kamram ba kongsan baroh.
