Shillong, Risaw 22
Ka Nongumlong Sports Club, Krang Sports Club bad ka MLP Football Team ki la khur ïa ka jingjop ha ki jingïalehkai jong ka lympung SSA SRGT 3rd Division Football League 2023 ba la pynïaid da ka Shillong Sports Association (SSA) ba la pynlong ha madan Third Ground MFA Turf, Polo.
Haba phai sha ka jingïalehkai ba nyngkong kaba la long ha ka por 11 baje mynstep, ka Nongumlong SC ka la lah ban pynliem noh ïa ka Rynjah Sports Club da 2-0 kol.
Ïa kitei ki ar tylli ki kol jong ka Nongumlong la ïoh ban thep da u Newlang Kharsahnoh ha ka minit kaba 58 bad u Sevenson Kharsahnoh ha ka minit kaba 65.
Haba phai pat sha ka jingïalehkai kaba ar, kaba la long ha ka por 1 baje mynsngi, ka Krang Sports Club ka la lah ban pynliem noh da haduh 4-1 kol ha ka jingïakhun pyrshah ïa ka Gorkha Association.
Haba phai sha ki kynta ïakhun, ïa ki kol jong ka Krang la ïoh ban khyrwit da u Kyrpanglang Mawlong ha ka minit kaba 5 bad 30, u Willjohn Kharsain ha ka minit ba 64 bad u Kynsaining Kharthangmaw ha ka minit kaba 75 katba ïa ka shi kol jong ka Gorkha Association la thep da u Anus A Sangma ha ka minit kaba 63.
Ha ka jingïakhun kaba khatduh jong kane ka sngi, ka MLP Football Team ka la lah ban pynliem kput noh ïa ka Umlyngka Sports Club da 6-0 kol, ha ka jingïalehkai kaba la noh shiliang.
Ïa kine ki hynriew tylli ki kol jong ka MLP FT la ïoh ban khyrwit da u Wankhar Nengnong ha ka minit ba 1, u Aldrin Ramsiej uba la khyrwit hat-trick kata ha ka minit kaba 19, 34 bad 38, u Bikram Chettri ha ka minit ba 51 bad u Ambrous Syngkli ha ka minit ba 80.
Ki jingïalehkai ban long pat ha ka 23 tarik mynta u bnai, kata ha ka por 1:00 baje mynsngi, ka Lapalang Sports Club kan ïakhun pyrshah ïa ka Nongmensong Sports Club, ha ka por 3 baje janmiet pat ka Lumdiengjri Sports Club kan ïakhun pyrshah ïa ka Tynring Sports Club.
