Shillong, Lber 07
Kan long ka sngi ka ban sahkynmaw ïa ki nongshong shnong jong ka thaiñ Laitlyngkot ba ha ka 7 tarik u Lber 2024, la ïoh ban plie ïa ka St. Peter’s Higher Secondary School, Laitlyngkot da u MLA ka thaiñ u Bah Gavin Miguel Mylliem.
U Bah Gavin uba long ruh kum u kongsan ha katei ka sngi u la pynpaw ïa ka jingsngewkmen haba plie lane kyntiew ïa ka St. Peter’s Secondary School, Laitlyngkot sha ka St. Peter’s Higher Secondary School, Laitlyngkot. U la ong ba ka jingdon jong ka shlem ai jinghikai kan plie lad ïa ki khynnah jong ka thaiñ ban bteng ïa ki jingpule jong ki. U la kyntu ruh ïa ki nonghikai jong ka skul ba kin trei bor bah ha ka kam jong ki ban ai jingnang jingstad ïa ki khynnah kiban long ka lawei jong ka ri.
Ha katei ka sngi la don lang ruh u Fr. Richard Majaw (Vicar General jong ka Shillong Archdiocese), u Fr. Bernard Laloo (Chancellor jong ka Shillong Archdiocese), u Fr. Kyrshanlang Kharpuri Parish Priest ka Laitlyngkot, ki sordar shnong, ki rangbah shnong, ki dkhot jong ka School Managing Committee, ki nonghikai, ki longkmie longkpa bad ki khynnah jong ka skul. U Fr. Richard Majaw bad u Fr. Bernard Laloo haba ai jingkren ha kane ka sngi, ki la kitbok kitrwiang bad pynshlur ïa baroh ban nang ïai trei shitom shuh shuh na ka bynta ka jingbha bad ka jingai ïa ka jingnang jingstad bapura ïa ki khynnah skul.
Ka skul St. Peter’s Secondary School, Laitlyngkot ka la ai jingshakri ïa ka thaiñ naduh ka snem 1967. Ki lah ïaid bun tylli ki snem bad ha ka jingshakri jong ka, ka la nang ïar bad nang kiew. Ha ki snem ba la dep ka la don ka jingdonkam bad ka jingthrang ban plie noh ïa ka Higher Secondary jong kane ka skul. Da ka jingkyrkhu U Blei, kane ka jingthrang ka la urlong bad la lah ban plie ïa ka Higher Secondary Section mynta ka sngi. Ha kane ka sngi la ïoh ruh ka jingpynshit jingpynshngaiñ na ki khynnah jong ka skul kiba la pyni ïa ki sap ki phong jong ki lyngba ki rukom bapher bapher ha katei ka prokram. La pynkut ïa katei ka prokram da ka jingplie ïa ki kamra klas jong ka 10+2.
Kane ka skul hapoh ka jingïalam jong u Fr. Kyrshanlang Kharpuri kum u Principal ryngkat ki nonghikai, ki School Managing Committee (SMC) bad ki khynnah skul ka pynpaw ïa ka jingsngewnguh kaba khraw ïa u Kongsan u Archbishop Victor Lyngdoh uba la ai jingbit, ki Lyngdoh kiba la trei ha kane ka Parish kiba la long ki nongprat lynti na ka bynta ka jingkyntiew ïa kane ka skul sha ka Higher Secondary Section, ïa ki ‘riew rangbah kiba la ai ka kti kamon ka kti kadiang, bad ïa baroh kiba la wan ha kane ka sngi kiba la ai mynsiem bad pynshlur ban plie ïa ka 10+2.
