Jong tang katto-katne tylli ki Seng bhalang (NGOs) ka bha shibun eh na ka bynta ka imlang – sahlang ha kiba bun ki liang. Hynrei kumba ka long mynta la jyllei shaba palat haduh ba la kulmar khlieh kthah khlieh ma ngi ki Paid nongshong Shnong ïano yn sngap kohnguh ïano yn nai sngap kohnguh. La ioh jingtip ba don ki Seng Bhalang ki leh ïa ki kam thombor kiba pyni ïa ka jingkhlem akor – khlemraiñ, leh baheh bahain, da kaba theh Petrol ei, leit lum pisa na ki Nongkhaiï, leit tur sha ki shnong khlem ka jingtip jong ki Bor Shnong /Dong, ki sngew ba ki kham don bor ma ki ban ïa ki bor pynïaid Shnong/Dong. Kum kane ka jingthombor ka dei ka kam bymman (criminal).
Lada don ba file case pyrshah ïa ki, yn poi sha ka kam kaba eh bha bad kan wanrah ïa ka jingkhlemraiñ ym tang ïa ki Seng Bhalang, hynrei ïa ka Jaidbynriew ruh kumjuh. Te, la kyrpad ba kin sngewbha ban da ïa pyrkhat sani bha ha shuwa ban leh ïa kino kino ki kam thombor nangne sha khmat.
Te, katba nang bun ki Sengbhalang (NGOs), nang kham jur shuh shuh ka ïapait-ïapra para ma ngi. Kumta ngi pyni ïa la ki Bor ki Bor ha la ki jong ki jong ki Seng Bhalang (NGOs) tang hapoh Sor Shillong jaboh – jabain, sha ki thain khappud lei – lei ym ju don ba shlan ban leit mih, namar ba tieng ïa ki bar jylla ba don bor bad ba shlur. Haba kumne hango mo kata ka jingïatylli para Khasi Khynriam – Pnar – Bhoi – War bad Lyngngam ?
Ka jubab ka dei katba dang don bun ki Seng Bhalang (NGOs) ngim nym ioh shuh ïa ka jingïatylli para mangi. Khamtam haba ka Jait Kmie ba kyrpang la kharoi ki khun sha ka 61/2 na ki Kpa bym dei Khasi. Tip ngi sngewtriem ne em shaphang kane? Ngam tharai phi, namar bun na ngi ki Rengmattah ba la shu bud sha ïing i lok (companion), nud hi ban saham? Em, em, em da lei – lei ruh em, ngam nud ioh shah beh hadien-habud khamtam ynda la tymmen. Yn leit shano? Lait sa tang sha ïing ka Mother Teresa Bd.
Namar bun na ngi don hangto.
Nangta katno katne kyntien ha kaba ai dei bad ka kam pyniap briew dusmon ïa ki tymmen, samla bad khynnah rit. Tip lano mo ngin pynkut noh ïa kum kane ka kam dakaid riewkhlaw (savage). Ha kum kine ki khep shano mo jah kita ki Seng Bhalang (NGOs) ban ïa tuklar lem lane leit jngoh lem lane ïarap ban wad lem ïa kum kine ki Riewkhlaw (savages) bad kem ïa ki pynshitom katkum ka Aiñ Shnong sa aiti sha ki Pulit. Ym dei ba nga pynshlur ban leh ïa ki kam pynshah ïa ka Aiñ ho. Nga shu ai jingmut lada sngew ïahap pdiang lada em bret sha ki Sniang.
Panbor B. Lyngdoh
