U Haroldson Dympep, Lawmali Pyllun Shillong
Hato, kam long mo ka jingjah burom ïa ka longïing longsem, ïa ka ri bad ba ka jaidbynriew, ba u longkñi u knieh noh shalade ïa ka burom bad ïa ka iktiar ka jong u longkpa, tang namar ka jingkyntiew kurim kaba donburom ka jong ki khun kti ki jong u ?
Ngam don jingartatien ban ong, ba kane ka jinglong bad jingleh jingkam jong ngi ki Khasi ka la wallam barabor ïa ka jingsngewsih bad ka jingbynñiaw ha ka jingim jong ngi hi.
Ha kum kane ka jinglong jingman, don mo na ngi, kiba la ju pynleit jingmut, ba kane ka jingleh jingkam jong ngi ka la wallam ka jingmyntoi kaba long ka jingkyrkhu ïa ngi u paid Khasi ne ka long kaei kaei ka bym itynnad dur ïa ka ban peit bad iohsngew ruh kumjuh ?
Ym lah ïa ka ban len, ba la don bun bah na ngi, kiba kynmaw kyndiang bad mad ruh ïa kane ka jinglong bad jingjia ha ka jinjgim kaba shimet jong ngi hi.
Hynrei, namar ka jingbym pynleit jingmut bha bad shim khia ïa, ka shu ïai long bad shuh ïai bteng haduh mynta mynne, bad ngam don jingartatien ruh ban ong, ba lada ngim pyntreikam bad pynbeit noh ïa ka, kan ïai long bad ïai bteng lynter taid lyngba ki sngi bad ki por ba dang wan ruh kumjuh.
Ngam don jingartatien ban ong, ba kane ka jingleh jingkam jongngi, ka la wallam, ym tang ïa ki jingsngewsih bad jingbynñiaw, hynrei, ka jingjah burom ïa ka ïing ka sem, ïa ka ri bad ïa ka jaidbynriew hi baroh kawei.
Te, katkum kine ki jingpynsngew jongnga, nga sngew ba ka la dei ïa ngi, ban pynsangeh noh mardor ban pyntrei kam ïa ka, khnang ba ngin lah ban ïoh ïa ka jingsuk bad jingtngen mynsiem ha ka jingim jongngi.
Halor ïa kiei kiba nga la ioh ban pynsngew, ïoh don napdeng jongngi hi ki paid khasi, ki ban ong pat, balei ngin pynsangeh noh ïa kaei kaba u longshuwa u manshuwa u la ong bad leh, ka long kaei kaei bym lah ban long haei haei ruh em.
Ho-oid, kam long kaba dei ia ngi ban ïaid lait na kaei kaba u longshuwa u manshuwa u la ong bad leh.
Lada ka dei ïa ngi ban ïai pyntreikam iaka, ka la dei ban don ki nongrim kiba skhem bad kiba dei biang ha kaba ngin ym don jingartatien ban pyntrei kam ïa ka.
Hynrei, kaba sngewsih ban ong, haba kylli ïa kito ki briew kiba ong, ba ngi dei ban pyntreikam beit ïa ka kumba la seng nongrim u longshuwa u manshuwa, ka jubab pat ka long beit, ym tip.
Haba baroh baroh ngi ïa ong ym tip, kam shym la dei ïa ngi ban pynsangeh noh ha ka ban pyntrei kam ïa ka?
Nalor ïa kiei kiba la pynsngew haneng, kane ka jinglong bad jingleh jingkam ka jongngi, ka wallam ïa kine ki jinglong kiba ktah ïa ka jingim jongngi hi, bad kita ki long kumne :-
1.Ngi wallam ka jingpynrem kaba dalade ïalade hi, kaba long hakhmat ka pyrthei bad khamtam eh ïa ka burom ka jong U Blei.
Naduh ka sngi ka jingïaieid samla ka jong ki khun ki kti jong ngi, ki la ïa pynithuh iwei ïa iwei pat ha la ki jong ki kmie ki kpa, jong baroh arliang ki longïing longsem.
Bad dei ruh haba ki kmie ki kpa jong ki, ki la sngewthuh shai ba kano kano ka sang ka ma bad ino-ino i jingpynwit iba rit eh iba lah ban khanglad khanglynti ha ka jingkyntiew kurim ka jong ki khun ki kti kam don, ba ki sa shah sngewbha ïa ki ban ïa leit ïa wan laitluid, ha ryngkat ka sneng ka kraw bad duwai ruh ïa ka jingdon ryng-kat ka jong u Blei ba ki khun jong ki kin ym hap bad kyllon noh, ha kaba ka jingkyntiew kurim jong ki kan long kaba jop, kaba pynsngewbha eh ïa u Blei.
Hynrei, kaba sngewsih ban ong, ba ynda haba la poi ka sngi ka ïa ban ïa pynbeit noh ïa ka jingkyntiew kurim ka jong ki khun ki kti, ki kmie ki kpa lem bad kiba haïing hasem ki paralok para marjan marpar jong baroh arliang kur, ki ïa pynlong ïa ka jingïawad dong wad daw pat, ioh dang don shuh shuh kano kano ka daw kaba khanglad ïa ka jingïapoikha poi man ki khun jong ki, da kaba leh klet ïa kaei kaba ki la pynsngew ha la ki jong ki khun ki kti bad kiba haïing hasem naduh kaba sdang ka jingïaieit ïathoiñ ka jong ki khun ki kti jong ki.
Kane ka long bad jingjia, ka long wat ha ka jingïapoi kha poi man ka jong ki khun ki kti kaba la long ruh katkum ka jingpynbeit ka jong ki kmie jong ki hi.
Ka pynlong bad pynlah ïa ngi ban leh pop bad kren ïa ka lamler :- Kane ka ktah khamtam ïa kito ki longïing longsem ki bym don la u longkñi. Khnang ban pyni pyrthei ba ki don la u longkñi, ki pynlong kñi da u riewshisngi, u bym dei uba mih na ka juh ka kpoh, hynrei tang namar ba u dei uba ïateh kur lane ba u dei na kajuh ka jaid ka kynja.
Ka pynkyrtoh ïa ka jinglong jingim jongngi hi :- Don bun bah ki riewrangbah kiba da sngewkhyllew bad sngew sarong ba ki dei ki briew kiba bitnam bad kiba dei biang ban mihkhmat kum ki longkñi ha ka jingïapoi kha poi man ka jong ki pyrsa jong kim, da kaba leh klet pat ba ïa ka iktiar bad ïa ka burom kaba ki don hok halor ki khun la jong, la sliah bad la dep sliah da u kni jong ki khun ki kti ki jong ki ha ka jingïapoi kha poi man ka jong ki khun jong ki hi.
Te, katkum kine ki jingpynsngew bad pynshai baroh, nga sngew ba kam dei shuh ïa ngi, ki longkñi ban kñieh noh ïa ka burom bad ka iktiar ka jong u longkpa, dei u longkpa hi uba dei hok ban mihkhmat ïa la ki jong ki khun ki kti, namar dei tang ma u, uba don ka jingkitkhlieh kaba dei biang na ka bynta la ki jong ki khun.
Kaba khatduh kaba nga kwah ban pynsngew ka long, ba lada baroh baroh ngi ri khuid ïa la ka jingim, kaba long katkum ki kyntien kiba ngi la khlei, ba kaba ho-oid kan long ho-oid bad kaba em kan long em, naduh kaba sdang, ha ka jingïakren bad ka jingïapyni ïa pynshai jongngi bad la ki khun ki kti, nga ngeit ba ki jingïalang jongngi ki arliang kur, ka jingïawad dong wad daw kan ym don, hynrei kan shu long beit beit, tang ka jingiapynithuh iwei ïa iwei bad ban ïa pynbuh beit ïa ka sngi kyntiew kurim ka jong ki khun ki kti jong ngi hi.
