Kolkata, ïaïong:
Ka Myntri Rangbah jong ka West Bengal ka Mamata Banerjee ha ka Sngi Balang ka la ong ba kan ym don wat tang kawei ruh ka ‘vote’ ka ban leit na ka bynta ka seng Bharatiya Janata Party (BJP), CPM, ne Congress, kum ka jubab halor ka hukum jong ka Calcutta High Court kaba la weng kam noh ïa 26,000 ngut ki nonghikai.
“Yn ym don wat tang kawei ruh ka ‘vote’ ka ban leit na ka bynta ka seng BJP ne ka CPM ne ka seng Congress, ka ban long na ki nonghikai, ym na kiwei pat ki nongtrei sorkar,” la ong ka Myntri Rangbah ha ka por ba ka la ai jingkren ha ka jingïalap ilekshon.
“Ka seng BJP ka la thied ïa ka ïingbishar, ka High Court, ym ïa ka Supreme Court,” ka la pynshai da kaba ong, “Nga dang don ka jingkyrmen na ka bynta ban pynïoh ïa ka jingbishar bahok na ka Supreme Court.”
“Ki (BJP) la thied ïa ka High Court. Ki la thied ïa ka kynhun CBI. Ki la thied ïa ka kynhun NIA. Ki la thied ïa ki BSF. Ki la thied ïa ki CAPF. Ki la pynkylla ïa ka rong jong ka Doordarshan sha ka rong soh, ki la kren mynta tang shaphang ka BJP bad Modi ka baat. Wat peit ïa ka. Kyntait ïa ka,” la ong ka Banerjee.
Ka Calcutta High Court ha ka lah sngi U Blei ka la pyndam noh ïa ka jingthungkam ïa ki 24,000 ngut ki nongtrei jong ka Teaching bad Non-Teaching ha ki skul ba la kyrshan bad ithuh da ka sorkar, ha kaba ki la kyntait ïa ka jingtreikam jong ka kynhun thungkam jong u snem 2016.
Ïa kane ka kynhun la thung da ka West Bengal School Service Commission (WBSSC).
Ka kynhun nongbishar kaba kynthup ïa u Justice Debangshu Basak bad Md. Shabbar Rashidi ki la ong ha ka por ba ka la don ka jingbishar bniah ba ki nonghikai ïa kiba la shah thungkam beaiñ ki la hap ban pynphai noh ïa ki tulop jong ki hapoh ki saw taïew.
Ka kynhun nongbishar ka la hukum ruh ba la dei ban khmih bniah biang ïa 23 lak ki OMR Sheets ïa kiba la pyndap ha ka por ba don ka jingthungkam.
Ka ïingbishar ka la hukum ïa ka WBSSC ba kan sdang biang da ka jingthungkam kaba thymmai. Ym slem hadien ka hukum, ka Mamata Banerjee ka la pynbna ba ka sorkar jong ka kan sa leit mih sha ka ïingbishar kaba hakhlieh na ka bynta ban pynibor halor kane ka hukum ba la ai.
U Myntri ka tnat pule-puthi ha katei ka por u Partha Chatterjee, u President barim jong ka Primary Education Board bad u MLA ka seng Trinamool u Manik Bhattacharya, u nongïalam jong ka kynhun ki samla u Kuntal Ghosh ki la long napdeng kiba bun kiba la shahkem ha kaba ïadei bad ka kam bamsap haduh mynta.
U nongbishar barim jong ka Calcutta High Court u Abhijit Ganguly, ïa uba mynta u la ïakhun ha ka ilekshon Lok Sabha na ka tiket jong ka seng Bharatiya Janata Party (BJP), u la hukum ba la dei ban phah tohkit ha ka kynhun Central Bureau of Investigation (CBI) halor ka jingdkoh treikam ha kaba ïadei bad ka jingthungkam ïa ki nonghikai.
