Katba ka por ka dang don ïa ngi to ngin ïa sangeh noh ïa ka jingpom pathar ïa ki dieng ki siej, ka jingthang rnga bad ka jingthang khlaw khnang ba ngin lait na ki jingeh kum u khun bynriew uba shong hapoh ka snieh pyrthei shipor. Kumba ka long mynta ka la sdang ban wanrah ïa ka jingkylla jong ka Meimariang ha ka suiñ-bneng bad ki jingpang kiba laiphew ka jait ki la sdang ban wan. Ka jingrngat bad nangrit nangrit jong ki wahduid ka la sdang ban trei kam, ka jingduna ha ki umbam umdih kane ruh ka la sdang, ka jingduna ka um ka la ktah ïa ki bording electric. ka jingkylla ka suiñbneng ka la ktah ïa ki nongrep nongriang namar ba u slap u la wan khlem da dei shuh ka por kumba ki nongrep ki donkam ban buh ïa u symbai. Ka la wan ka jingkhluit ha ka por mynsngi bad ka jingkhriat ha ka por step bad janmiet. Ka jingthang ïa ki khlaw ki btap ka pynduh noh ïa ki mrad ki mreng, ki sim ki doh bad khamtam ïa ki dieng kiba dang khielung bad ïa ki kynbat dawai. Kumta ngi kyntu ïa ki Sordar Shnong bad ki Rangbah Shnong ba ngi dei ban pynshitom katkum ka aiñ jong ka shnong ïa kiba leh pyrshah ban thangdieng ïa ki khlaw. Ngi kyntu ruh ïa ki paidbah ba ngin shim ïa ka jingkit khlieh kum la ka jong na ka bynta ban pynjyrngam ïa ka Meimariang. Ka la dei ruh ka por ïa uwei pa uwei naduh u barit haduh uba heh, naduh uba riewspah haduh uba duk, ban ïa klet noh ïa ka jingsngew party bad ïa ka sngew niam kumjuh ruh ïa ka jingsngew jaitbynriew. Kum ki briew kiba shong hapoh ka ri India ngi ïa long kajuh khnang ban lait na ki jingeh bad ki jingjynjar ki ban ïa kynduh nangne shakhmat. To ngin ïa snohkti lang ban pynjyrngam biang ïa kane ka sla pyrthei kaba long ka jain kup ïa uwei pa uwei u jingthaw uba im khnang ba kan ym long ka jingtim ïa phi ïa nga ha ka pateng ka ban sawan. Ngi don kam ruh ban thung ïa ki dieng ha ki jaka kiba lait. Ka jingdon jong ki dieng ki siej ka pynsboh ïa ka khyndew bad ka bad ruh ïa ka um ka wah bad ka pynsngem ïa ka khyndew.
“Ka jingthang ïa ki khlaw kan pynduh jait bad pynïap ïa ki jingthaw ba im”
D. D. L. Nongbri – President
F. Diengdoh – General Secretary
