Islamabad, ïaïong:
U nongialam ka liang pyrshah jong ka Pakistan- u Maulana Fazlur Rehman ha ka Sngi Nyngkong u la ai jingkyrshan ia ka seng Pakistan Tehreek-e-Insaf da kaba ong ba ka liang pyrshah ka don ka hok ban pynlong ia ki jingialang paidbah hapoh ka ri bad ban thaw sorkar thymmai ruh na ka bynta ka lawei jong ka ri.
U Rehman, u long u nongialam jong ka Jamiat Ulema-e-Islam Fazl (JUI-F) bad u la kren ia kitei ki kyntien hapoh ka National Assembly, da kaba ther pyrshah ruh ia ki jingleh bad rukom treikam jong ka sorkar Pakistan ha kine ki snem namar u la ong ba kam lah ban pyllait ia ka Pakistan na ki ram-ki shah bad ki jingeh kiba ka Pakistan ka la kynduh baroh shi katta hynrei ka sahkut hajuh-shi-hajuh.
Namar kata, u Rehman u la ong ba ka seng PTI ka don ka hok ban pynlong ia ki jing-ialang paidbah hapoh ka ri bad ban thaw sorkar thymmai biang khnang ban wanrah pat ia ka lawei baphyrnai na bynta ki pateng ki ban wan jong ka ri Pakistan.
Kumjuh ruh na ka liang u nongialam ka PTI- u Asad Qaiser u la dawa ia ki bor ka aiñ hapoh Pakistan ba kin ailad ia katei ka seng ba kan pynlong ia ki jingialang paidbah wat haba shibun ki jingshah kynthoh bad jingshah pharep ki la mih ha kine ki sngi haba iadei bad ka jingshah pharep bamsap ka kurim jong u Myntri Rangbahduh ka ri- u Imran Khan bad kumjuh ruh ia utei u nongialam uba la shah kynnoh don kti ha shibun tylli ki kam be-aiñ bad ki kam bei pisa be-aiñ ha ki por ka jingialam jong u ia ka ri ha ki snem ba la leit.
Dei namar kane ba utei u nongialam u la ong ba haba peit thuh ia ka jinglong- jingman ha kine ki sngi, ka India ka la nang kiew ha ki liang baroh bad ka la jan poi sha kliar jong ka thong ba ka buh baroh shi katta. Katba ha kawei pat ka liang, ka Pakistan ka la sdang ban hiar bad ka la shu ap na kiwei ki ri bad na ki tnat jong ka pyrthei kum ka nongkhrong bad u la ong ba kane ka long kawei na ki jing pynlehraiñ ia ka ri bad ka jaitbynriew lada ka sorkar Pakistan kam lah ban leh eiei.
