Jalisco, Naitung:
10 ngut ki nongleitnongwan, ki la duh ei noh ïa ka jingim jongki hadien ba kawei ka trok ka la leit rat ïa ki katto- katne tylli kik kali ha ka surok jong ka nongbah Jalisco jong ka ri Mexico ha ka Sngi U Blei, ha kaba 2 ngut napdeng jong kitei kiba khlad ki dei ki khynnah rit. Kane ka la jia ha ka shnong Hostotipaquillo, kaba don markhap bad ka nongbah Jalisco, sha ka phang West jong ka Nayarit. Katba ki nongtrei surok ki dang leit peit ïa ka jingjia iatyngkhuh ki ar tylli ki trok kaba la jia ha ki khyndiat por hashwa jong kane, la ong ba katei ka trok kaba lai pat ka la leit tur bad leit rat ïa ki kali kiba dang ieng sahkut blok ha katei ka surok bah bad kaba la wanrah ïa katei ka jingjia ba sngewsih bad ba sniewbok ha kaba 10 ngut ki mynsiem briew ki la shu iap ei ha shen. Ar tylli na ki trok kit mar bad lai tylli kiwei pat ki kali ki la kem ding ha katei ka jingtyngkhuh, katba kawei ka trok pahara jong ka tnat shipai pahara ka Mexico ruh ka la julor ha katei ka jingiatyngkhuh kali kaba jur. Haba iadei bad kane, la ong ba kitei ki 2 ngut ki khynnah ruh ki kynthup lang napdeng kitei ki 10 ngut kiba khlad ha katei ka jingjia. Ha katei ka jingjia, ki don sa shiphew ngut ki briew kiba la mynsaw, ha kaba arngut na kitei ki dei ki ophisar jong ka National Guard bad la iathuh ba ki don hapdeng ka jingshitom kaba jur bha bad kumjuh ruh 4 ngut kiwei pat ki nongshong shnong jong ka US, ki la shu mynsaw malu mala bad kam shym don kanokano ka jingma ïa ka jingim jongki. Ki jingjia iatyngkhuh kali heh hapoh Mexico, ka ju jia bunsien namar ka jingbym maramot bha ïa ki kali, ka jingpyniaid kali kaba shyrkhei ne ka lah ruh ban long namar ka jing thurmur jong ki nongñiah kali.
