Shillong, Jymmang 03
Ka Langsning FC ka la pynjem khnap haduh 5-1 kol ïa ka Ryntih SC kaba ïakhun sa tang khyndai ngut ki rangïalehkai ha ka lympung ïalehkai Shillong Premier League 2023 ha ka sngi Thohdieng ha SSA Stadium kaba ha First Ground, Polo.
Kane ka nam jop ka la wan urlong lyngba u Wilbert Marbaniang uba la ïoh ban thep ar kol, katba ïa kiwei pat la pymbud da u Dapmonlang Pathaw, Dawandappura Biam Pathaw bad u Kordor Dkhar.
Lyngba kane ka jingjop ka Langsning kaba la la lah ban pynthikna lyngba ban jam sha ka semi final, ka la kiew sha ka kyrdan balai ha kaba ka la ïaryngkat mar 15 point bad ka Shillong Lajong, kaba la don ha ka kyrdan ba-ar.
Ha kane ka jingïakhun, ka Ryntih ka la ïakhun tyngeh naduh kaba sdang ha kaba ka la ïoh ban pynkhih jar lyngba u Aatish Rai ha ka minit kaba 17. Kane ka kol ka wan na ka daw ka jingbym lah ban kyrda da ki rangïalehkai ‘dien ka Langsning.
Kane ka shi kol ka la pynkyndit ïa ki ïalehkai ka Langsning ha kaba ka la pyrshang ban ïakhun tyngeh na ka bynta ban pynphai. Kane ka jingïai pyrshang ka la wan urlong shwa ban kut ka jingïalehkai jong ka kylla step lyngba u Willbert ha ka minit kaba 41 na ka bynta ban ïakhaid mar 1-1 kol.
Hadien san minit ba la bteng ïa ka jingïakhun jong ka kylla miet, ka Langsning ka la ïoh ban thep biang ïa ka kol kaba ar lyngba u Dapmonlang, ha kaba ka bol ka la leit dei na diengkol bad ka la rung hi jlang. Kane ka jingshah thep kol ka la pynlong ka jingbym hun ïa ki ar ngut ki rangïalehka ka Ryntih kata u Wanshan Dkhar bad u Kamran Farooque, kiba la ïohpdiang ïa ki ar tylli ki yellow card na ka daw ba ki la ïania bad ki bor pynïaid (rephri).
Ka Langsning ka la thep biang ïa ka kol kaba lai lyngba u Dawandappura ha ka minit kaba 60 ha kaba u rangapkol ka Ryntih u Dipanjan Debnath um shym la lah ban khanglad ban leit na ka jingshah thep.
Hadien shiphew minit u Wanshan u la ïohpdiang ïa ka yellow card kaba ar bad ka la pynlong ïa u ban shah beh syndon na madan bad dei kane kaba la pynlong ïa u Kamran ban ïa nia bad u rephri, ha kaba u la shah sei biang ïa ka yellow card kaba ar. Lyngba kane ka jingshah beh noh kitei ki ar ngut, ka Ryntih ka la hap ban ïalehkai noh sa tang khyndai ngut ki rangïalehkai.
Dei hangne ba ka Langsning ka la ïoh ïa ka kabu kaba biang bad ha shwa ban wai ka la ïoh ban thep kol biang lyngba u Kordor (83) hadien ka jingïarap lang u Roikhihbha Nongtdu. U Wilbert u la thep biang ïa ka kol kaba ar ha ka minit kaba 86 na ka bynta ban pynlong ïa ka Langsning ban khur syndon ïa ka jingjop.
Ka jingïalehkai kaba khatduh jong ka ’round robin’ kan kut ha ka Sngi Saitjaiñ ha kaba ka Mawlai SC kan ïakhun pyrshah ïa ka Nangkiew Irat SC ha ka por 3:15 janmiet. Kumba ka paw ka Mawlai (13 point) ka la don ha ka kyrdan basaw bad lada ka Nangkiew Irat ka lah ban jop kan jam sha ka kyrdan ba hynriew ha kane ka lympung.
