Itanagar, Jymmang:
Ka kynhun Special Investigation Cell (SIC) jong ki pulit ka Arunachal Pradesh ki la kem sa ïa uwei pat u briew uba la donkti ha ka jingthungkam beaiñ ïa ki nonghikai bad kiwei pat ki nongtrei skul hapoh ka tnat ka pule-puthi ha Lower Siang distrik. Kane ka jingkem briew ka la long hadien ba la dep ban buh jingmudui da ka SIC ha ka 3 tarik, Rymphang, katkum ka kaiphot ba la phah da u Director of Elementary Education halor ka jingdon jong ka kam beaiñ na ka jingthungkam ïa ki nonghikai Primary bad kiwei pat ki nongtrei skul ha ka tnat pule-puthi ha Siang, la ïathuh u heh pulit ha ka Sngi Palei.
Une u briew u la shahkem hadien ba la khmih bniah ïa ki kot ki sla, ka jingtohkit ïa kiba la shah suba bad ka jingdon ki sakhi kiba biang, la ong u Superintendent of Police of SIC (Vigilance), u Anant Mittal.
Ïa une u briew uba la shahkem, la tip kyrteng kum u Mikjar Ngulom ba la tip ruh da ka kyrteng kum u June Lendo (32), uba dei u nongshong shnong jong ka New Bomte kaba don ha Lower Siang distrik, u la ong. Ki la don kumba 8 ngut ki briew kiba la shahkem ha ka kynhun SIC haduh mynta ha kaba ïadei bad ka jingjia.
Ka jingtohkit jong ka kynhun SIC ha kaba ïadei bad kane ka jingjia ka dang ïai bteng bad baroh kiba la shah suba ki dang shah tohkit bniah mynta, la bynrap shuh shuh u Mittal.
