![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 24
Ka P.V Sindhu kaba dei ka khlur ïalehkai badmin-ton ka ri bad kaba la khur takma teng ha ka Olym-pic ka la nangjan ban kynjoh sha ka nam lahduh ha ka Malaysia Masters hadien ba ka la jam sha ka semi final lyngba ka jingjop ïa ka nongïalehkai kaba na China ka Han Yue ha ka sngi Thohdieng.
Ka Sindhu kaba la bat ïa ka kyrdan ba 15 ha ka pyrthei ka la lah ban pynliem noh ïa ka Han da 21-13, 14-21, 21-12 ha ka jingïakhun kaba la neh 55 minit jong ka quarter final. Kane ka jingjop ka wan ruh hadien na ka jingshah rem dangshen ha katei ka nongïalehkai na China ha ka Asia Badminton Championships kaba la long mynshem bnai ha Ningbo.
Ka Sindhu kaba la bat teng ïa ka nam lahduh ha ka pyrthei kan pynkhreh ban ïakhun semi final pyrshah ïa ka ‘thei ïalehkai na Thailand ka Busanan Ongbamrungphan kaba la lah ban pynliem noh ïa ka Putri Kusuma Wardani na Indonesia.
Ha kawei pat ka jingïakhun, ka Ashmita Cha-liha ka la shah rem ha ka quarter final da 10-21, 15-21 ha ka Zhang Yi Man na China.
Ka Sindhu kaba la rah nam lahduh ha ka Singapore Open ha u 2022, ka la lah ban pynpaw ïa ka jingtbit ha ki 55 minit. Wat la ki la ïakhaid mar 3-3 ha kaba sdang jong kane ka jingïakhun, hynrei ka la lah ban tam da 11-5 ha shwa ban shongthait shipor.
Katei ka nongïalehkai na China ka la lah ban tam da 13-16, hynrei ka Sindhu ka la lah ban kamai 5 point na ka bynta ban tam haba sdang ka jingïakhun.
Ka Han ka la ïakhun tyngeh ha ka wat ba ar ha kaba ka la lah ban tam da 5-0 na ka bynta ban bteng da 15-2. Ha ka jingïakhun jong wat ba lai ka Sindhu ka la lah ban tam kylla da 11-3 bad ha kaba kut ka la lah ban jop syndon pyrshah ïa ka Han.