D. H. Kharkongor
Nga ngeit u dei Heroin, uba dei uta u ‘synthetic drug’, ïa uba la saiñ thikna bha na uta u ‘morphine’. ïa u ‘morphine’ la saiñ ne la ‘process’ na u jingthung uba ngi tip ïa u kum u ‘Poppy plant’. ïa u Heroin la tip ruh kum u ‘white sugar,’ da ki nongpyndonkam ïa u, na ka daw jong ka jingïasyriem ka jong u bad ka shini ronglieh kabani. Ka jinglieh ka jong u Heroin ka dei kawei na ki dak ki shin ba u dei uba dang kynshai lane u bym pat don kano kano ka jingkhleh (adulterant) ha u. U ‘Heroin’ u kylla rong ‘brown’ tad ynda u don ha u ïa ki jingkhleh. Ka jingkylla rong ka jong u ka dei kawei ka dak ka shin ba um dei shuh uba kynsai.
U ‘Brown Sugar’ lane u ‘Smack’ u dei u ‘Heroin’ uba la kyllarong, na ka daw ka jingbym long kynshai shuh ka jong u. Lah ban ong ba u ‘Brown Sugar’ u dei u ‘Heroin’ ba la khlehlang bad u ‘chalk powder’, u ‘zinc oxide’ lem bad ka ‘strychnine’. Ki don kiba khlehlang ruh bad u ‘starch’. U don ruh u jait ‘Heroin’ uba lamrongïong, uba ïasyriem ïa ka rongsurok ne ‘tar’ bad uba bit-nah, ia uba la tip kum u ‘Black Tar Heroin’. ‘Di-acetyl Morphine’ ka dei ka kyrteng kaba shisha ne ka ‘scientific name’ ka jong u ‘heroin’.
Ngin nym ïa kren ïa ki daw ki dong kiba pynlong ïa u briew ba un ngop ha ka jingpyndonkam ïa u ‘Herioin’, hynrei tang ïa ki dak ki shin jong ka jingpyndonkam ïa u. Ki don ki dak ki shin da kaba yn lah ban ithuh ba u briew u la sdang ban ngop ha u ‘Heroin’. Kita ki dei ka jinglynga ka jingpisa mynsiem ne ka jingkhih khuslai ka jong u, kaba khlem nongrim; ka jingbym suitniew ne ka jingbymsngewtynnadshuh ne ka jingbym lah shuh ka jong u ban ïai pynleit jingmut, la ha la ka pule ka puthi ne ha la ka kam ka jam; ka jinglong thut shen bad ka jingdomriang, kaba khlem nongrim; ka jingkylla noh wak na ka jinglong tynrai; ka jingsdang ban sngewtynnad ïa ka jinglong weibriew, da kaba ïaleh ban kiar, katba dang lah,na la ki jong kiba ieit kiba thoit.
ñiuma, katba u ‘Heroin’ u dang treikam ha ka met ba u briew u long lam jar jar, u long kynjai ne u palei jinglong. Kum ban shu ong noh um i don jingkhuslai jingmut jingpyrkhat. Um i don jingsngewsih. U da long shisha kumta, tangba tang katba u ‘Heroin’ uba u dang shu dep pyndonkam u dang treikam bha. U kylla jinglong dei tad ynda uta u ‘Heroin’, uba don ha ka met ka jong u, um trei kam shuh. Ne tad ynda ka met ka jong u ka sdang ban dawa biang na u ïa u ‘Heroin’.
Ka jingthok ka jingthak kaba ju ïaid ryngkat ryngkat lem bad ka jingïai dawa ïa ka pisa ki dei ki dak ki shin ba u briew u lah dep ngop lane ba u long kyrni ïa u ‘Heroin’. Ka tuh ka thiem ne ka prong ka lute ki dei ki dak ki shin jong ka jingdonkam palat ïa ka pisa,na ka bynta ba un ioh ban thied ïa u ‘Heroin’, uba ka met ka jong u ka dawa na u.
Ka ‘drug withdrawal symptoms’ ki dei ki dak ki shin kiba paw shabar ban pynshisha ba u briew uba thrang ban iehnoh ia u ‘Heroin’, um sngewnang shuh ban im lane um sngewlah shuh ban im khlem u ‘Heroin’. Ki dak ki shin ba u lah da shah teh shah khum shisha, kum u mraw, ha u ‘Heroin’. Ka jingthngan kaba khlem nongrim; ka jingbymlah pat de ban bam, wat haba sngewmat thngan; ka jingthait ka jinglwait jong ka met kaba khlemnongrim; ka jingkyiuh jong ka met ka phad; ka jingsngewsuhkhriat, wat haba syaid ka suiñbneng bad wat ka jingthehsyep kaba khyllah, khamtam mynmied mynïong. Kita ki dei ki katto ki katne ki dak ki shin jong ka ‘drug withdrawal’ lane ka jingïaithrang jong ka met ïa u ‘Heroin’. Kiwei pat ki dak ki shin ne ki ‘symptoms’ jong ka ‘drug withdrawal’ ne ka jingïai thrang jong ka met ia u ‘Heroin’ ki dei ka jingsngewtieng sngewsmiej, kaba ym sngewthuh shai pat de tieng ïa kaei; ka jingbymshai jong ka jingmut ka jingpyrkhat; ka jinglong kaba shu ngoi ngoi beit; ka jingset khmut lane ka jingïai mih jong ka eitmutsngur, wat haba ym don ïa ka jingpang baïongkhlieh; ka jingjylliep khapngain ka jong ki khmat; ka jingmih bad ka jinglang jong ki eit-mat;ka jingbymlah ban iohthiah bha; ka jingïairuma bad ruh ka jingktha khyllah jong ka met ka phad.
Lah ban sngewthuh na kitei kiei kiei ba kam long kaba suk hynrei kaba eh shisha, ïa uba la ngop ha u ‘Heroin’, ba un laitsuk na ka jingshah teh shah khum ha u ‘Heroin’. Kam dei ka kam kaba suk wat lada uba la kum kyrni u lah sngewthuh shai ba ka dei ïa uba un ïehbeit noh shisyndon ïa u ‘Heroin’. ñiuma, la u la kut jingmutskhem ban iehnoh shisyndon ïa u ‘Heroin’ pynban ka long kaba eh ïa u wei ba ka met kaba la mlien bad kylla myllen ïa u ‘Heroin’ kakulmar lada kam lah ban ioh shuh ïa u ‘Heroin’. La u briew u thrang bad u sliang ban iehnoh ïa u ‘Heroin’ pynban ka met ka jong u pat de ka dang ïaidawa na u, ïa u ‘Heroin’. Kaba da kordit shisha ïa uba kum uta u briew. Ka da ktah jur syndon hi ruh wat haduh ïa ka pyrkhat ka pyrdain ka jong u. Kaei kaba u mad u shem ka ktahjur haduh ïa kiba ieit kiba thoin ki jong u. Te hato kam dei ia ngi ba ngin sngewlem bad sngewkhiamynsiem pynban na ka bynta ka jong u, lem bad ka ïing ka jong u ? ïa kiba kum kita hato ka don jingmut ban shoh ban dat ne ban bom ban tied ne biah pongrai?
Nga kubur ba U ‘drug’ u la sar, sngewmat kumba sar ka khlam,ïa ka Ri Khasi hi baroh kawei. Nga kubur pat de ruh ba ha kaba ïadei bad ka jingkynrei ka jong kiba la ngop ha u ‘drug’ ne ha kaba ïadei bad ka jingïakhun pyrshah ïa u ‘drug’,ngi dei ban aiti beit thik tang ha kiba la ‘pyntbit kyrpang’ ïa kata ka kam.
Ynda haba pynkutnoh ba ym lah khlem da sngewthamula ïa kata ka jingkhangpyrshah, da kane ka Sorkar MDA-2, ha ka sngi ban pynbna ïa ka ‘MP Election Result’, ïa ka jingïaïaid kynhoi ne ka ‘victory rally’ da kiba jop, kaba ha ryngkat bad ka pynjari ïa ka kyndon 144 jong ka CrPC. Ka rai kaba lehse ka mih na ka jingbym sngewthikna shuh jong ka BJP bad ka RDA ba kin jop ha kane ka kynti kaba mynta.
