D. Pakyntein
“Ka jingim basohsat”. Nga ngeit ba baroh ki nong pyndonkam ïa u drok, ki kwah ban ïehnoh, hynrei ka long kaba shitom bha. Shisien, nga lah iohlad ban leit shah hikai ha National Academy of Customs, Indirect Taxes and Narcotics (NACIN) Mumbai. Baroh ngi dang pyrkhat ba ngin shah hikai ha ki ophisar IPS/IRS/Customs, kiba lah trei kham bun snem. Hynrei, ngi shah hikai ha ki Doktor, ki Saiantis bad ki riew shemphang. Hangne ngi ioh jingtip ba kino kino kiba pyndonkam da u drok heroin u bym pat khleh kata 100%tang lai sien, lah kylla kyrni, bad ka lah eh ban iehnoh khlem da ioh ka jingsumar kaba paka, sngew shyrkhei, namarkatta, wat kwah tip katno u bang ioh jahbang. Ban iohnong, kine ki nongkhaiï, nongdie, ki ju khleh lang bad u soda, ki dawai kuli, ka bih khnai, lane kino kino ki powder balieh, bad ka long kaba kham mynsaw bha ban ïa utai u drok. Kito kiba pyndonkam ïa u heroin, ki hap ban pynlut kumba 500-1000-2000 tyngka shisngi, ka shong lah katno bnai ne snem ki lah pyndonkam, bad ym lut kattei shi sngi ban shah sumar. Ym don kmie don kpa ba lah ban ai pisa ïa ki khun haduh kattei ha ka shi sngi. Kane ka pynlong ia ki nongdih ban long ruh ki nongdie.
Ko kmie ko kpa baieit, hangne ngi ioh jingtip kumno ngin tip ne suba, la ki khun jongngi ki pyndonkam drok ne em, kaba nga kwah ban ïa phylliew jingmut lang. Lada phi shem ba jah tiar jah tar man ka por na ïing, sa wad hadien. Hynrei, khmih/syntiat bha ïa ki khun. Lada ym ïoh drok, kin suh khriat, kin syep, kin shitom kpoh, kin khluid ki snier, kin kulmar jingmut, bad ki im ka jingim kaba ipher, kam long shuh kumba long barabor. Ki ïaid sharum shaneng ne ki set ïalade ha kamra thiah. Lada jia ba jah ki dawai dashin, kata te ka lah don kaei re kaei kaba ki khun ki lah ngat ha kane ka apot. Bret lut ki dawai ba lah dier por ne bym donkam shuh.
Kito kiba thrang ban lait na ka jingshah teh mraw ha u drok, phla noh mynta, wat lehraiñ, ym don ba ibeiñ-ikhoh ïa phi, wat sheptieng ruh, ka section 64A jong ka NDPS Act 1985 kan ïada lada phi pdiang ban shah sumar (ym ïa ki nongkhaiï /nongdie). Sngewbha shim ïa kane ka kabu ksiar, kaba phin ioh tang shisien ha ka jingim ka jongphi. Wat ap haduh ban shah kem bad sha along bun bun snem. To sngew synei ïa ki kmie ki kpa, ki hynmen bad ki para rit, namar lada jia ba hap leit sha High Court bad Supreme Court, lah hap die bad ïing bad sem, bad ym tikna hi ruh lada yn lait ne em, sepei ka spah ka phew. Peit ia ka Potter Net TV, ne kiwei ruh ki channel, kiba ïadei bad kane ka phang.Hangto, phin iohi kumno kito ki samla bashlur kiba ju im kum phi.Pynban, mynta ki long ki nongïalap/shipai pyrshah ïa u drok. Nud ruh ban ai nam ïa ki “Ki Khlur ka Ri”
Ki section 41- 42 jong ka NDPS Act 1985, ki pynkup bor tang katto katne ki ophisar (ym baroh), ban talasi ne kem. Baroh ngi kwah bha ban leh ïa ki kam babha na ka bynta ka Ri bad ka Jaitbynriew, hynrei ngi dei ruh ban bud ïa ka aiñ. Ka HYC ka lah trei bor bah bha ha kine ki sngi, bad ha kawei ka sngi ki sengbhalang ki lah ban ioh jingtip ba don u drok 10…..1000 grams ha uno uno ne kano kano ka briew, ïing, ne kali. Wat leit marwei, ki nongkhaiï baheh, ki don pistol /suloi. Pyntip sha kiba lah pynkupbor. Ka lah ruh ban long ba lah ioh bat ïa ki briew ne kali ba suba kit drok, sngewbha wat talasi, wat leh eiei, kaei kaba lah ban leh ka dei ban bat ïa ki bad da ring dur ruh, nangta sa pyntip sha ki bor ba dei khmih. Namar lada ioh kurup khlem ka aiñ, shitom bha ban ïakhun mukutduma ha ïingbishar. Mynta ka buskit ka heh bha kumba la pynbna da ka Sorkar Kmie ïa kiba pyntip mano ba khaiï drok ne ganja bad kiwei ki jingdih ba lah mana. Ka buskit ka lah ban poi haduh 60 hajar tyngka shi kilo u heroin bad haduh 300 tyngka shi kilo u ganja bad ka shong kat kum ka jingkhlaiñ bor ka jongki.Don ki por lah ioh kurup palat 1000-2000 kilo u ganja, kheiñ hi ïa ka buskit. Lada don ba iohi ba don ba kit ganja, wat leh eiei, hynrei, pyntip sha ki bor ba dei khmih, ïa u nombar bad ka rong ka kali, hangno ka don bad shano kan leit. Phone tang katto katne minit, bad lada ioh kem, kit da ki hajar ne lak,bad ïa ka kyrteng jong phi yn buhrieh, ym don ba tip.Kito kiba kwah ban trei ïa kane ka kam, leit sha kine ki ophis ba dei khmih, kin hikai kumno phin leh, namar ki buit trei kam ym lah ban pynlait paidbah hangne.
Lada baroh ngi ïatrei lang, ngin lah beit ban rat diengkhong, bad ka Jylla jong ngi kan sa ioh ïa ka nam kaba nyngkong eh ha ka Ri.
