New Delhi, Jylliew:
Ka seng Communist Party of India (Marxist) ka la pynrem jur halor ka kam thombor ba la leh da ki lehnoh ha Reasi distrik jong ka Jammu & Kashmir, la ïathuh ka tyllong khubor. Ha kane ka jingjia ki la don baroh 10 ngut ki briew kiba la ïap bad kiba bun kiwei pat ki la mynsaw na ka jinghap jong ka bos sha riat kaba la kit ïa ki nongleit ïaid riewblei namar u nongñiah um shym lah shuh ban tehlakam na ka jingthombor jong ki lehnoh ïa ka kali ha Reasi distrik kaba don ha Jammu & Kashmir, la ïathuh ki heh pulit.
Ki la don kumba 41 ngut ki briew kiba la mynsaw hadien ba ka bos kaba ki shong kaba la thmu ban leit sha Shiv Khori Cave Temple ka la hap sha riat na ka jingshah siat ha ki lehnoh.
“Ki la don 9 ngut ki briew kiba la ïap bad 33 ngut kiba la mynsaw,” la ong u Vishesh Mahajan, uba long u District Magistrate jong ka Reasi, ha kaba u la ong ba la ïoh jingtip ba uwei u la ïap na ka jingshah siat ha ki lehnoh.
U heh pulit jong ka Resai ha ka jingpyllait khubor jong u, u la ong: “Mynta ka kynhun jong ki lehnoh ka la thombor ïa ka bos ba shong ki nongleit ïaid riewblei na ka thaiñ Ransoo jong ka District Reasi. Na ka jingshah thombor u nongñiah jong ka bos um lah shuh ban tehlakam bad kane ka bos ka la hap noh sha riat kaba don hajan ka thaiñ Kanda jong ka Pouni Reasi. Ha kane ka jingshah thombor, ki la don 9 ngut kiba la ïap bad kiwei pat ki la mynsaw. Ïa kiba la mynsaw baroh la pynkit sha ki jaka ai jingsumar kiba marjan.”
Ki pulit ki la ong ba ïa ki heh pulit bad kiwei pat ki pulit la phah sha katei ka jaka ba la jia ka jingjia bad ïa ka thaiñ baroh kawei la kerkut da ki pulit bad ka kynhun shipai. Ka jingleit thwet lehnoh haduh mynta ka dang ïai bteng. Ha ka jingphah jingthoh, ka seng CPI(M) ha J&K ka la dawa ka bailutksan na ka bynta ki lanot bad bthah ruh ïa ki heh sorkar ba ki la dei ban pynduh noh ïa kum kine ki jingjia kiba ïai jia na ka por sha ka por.
