Bah D. Pakyntein
Lah iohi ba tang ban bam smai, ban long ki MP ruh ym pat dep, lah kynton ïa ka ILP, ka Kyrnit ba 8, bad kiwei ki kam ba lah sahteng ha u Prah. Ba lada ka seng kam lah ban pynurlong, u paidbah un kyntait. Ki klet ban kylli shuwa ïalade, ki leh aiu baroh shi katta? Hooid donkam bha ïa ka ILP. Hap wad ki daw ki ñia kiba paka bha khnang ba ka Sorkar Kmie, kan sngap. Long hi ban leit pan skhim khlem da don ki daw, ki ñia kiba biang, kiba lah ban pynhun ïa ka sorkar kmie ? Haba ki khun ki pan pisa na ki kmie ki kpa, kin ym ioh lada kam don ka daw ka ñia kaba biang. Kumba paw ha ki lad pathai khubor ba pan jingkheiñ shaphang ki skhim, ngin ïa ap kaei ka ban jia. Man ka sngi lah iohsngew ba ka long kaba shitom bha ban ioh ïa ki skhim pynroi, namarba ka jylla ka phah da ki MP ki bym don bad ka sorkar, ne u MP ka Shillong, um don bad kiba bun. Ka don ka Directive Principles of State Policy, bad pule shuwa tang ka Artikel 21A, lah biang, kiwei sa pule hadien, namarba ka Konstitution, ka rben, ka heh palat, haduh ba u Narendra Modi, u hap kyan ban rah ba ka khia, ym dei ito i kot rong saw ba purthuh ïa u. Bad ka shitom bha ban sngewthuh, kam lei lei, ka dei ka kam jong ki plidar bad nongbishar ban pule bniah. Ha Ri lum Garo, ka BJP kam don MLA, hynrei ban pynheh ïa ka Sports Complex, ka Sorkar Kmie, lyngba ka tnad Ministry of Minority Affairs, ne ka tnad na ka bynta ki rit paid, ka bei pisa da ki spah klur. Bad la khot ïa ka, ha ka kyrteng u P.A. Sangma, uwei na ki riewkhraw ka jylla bad ka nam ka jong u, kan sah junom. Namarkata wat pynsngew thuh bakla. Na ka bynta ban pynkiew ïa ka jylla, ym dei shuh ban peit seng ha Iingdorbar, la donkam sa ïa ka Kti u Saleng, ban ïapeh lang ïa u Prah.
Shuwa ka elekshon lah iohsngew ba u MP ka VPP, un hap don beit, la ha ka liang synshar ne liang pyrshah, bad kam don kata kaba hapdeng. Long ki ba sian badno yn ïatehlok, lada ym don, ka bha ba shong marwei: hynrei u don U Blei, namar tang bakla ki lok, lah shah kynnoh lang : Husiar. Hato, tang ba don ha liang pyrshah, hap pyrshah lut ïa ki bill, kiba donkam? Lehse, ka lah ban mih ka bill kyntiap seng ha ki District Councils, kaba hap pynbeit ym ban pynkylla ïa ka konstitushon, kaba lahpynsngewthuh bakla, hato yn kyrshan ne em? Man ka por ki liang pyrshah, ki ju mlien ban mih na ïingdorbar, khlem ka daw kaba biang. Ha kane ka dorbar mang tyngka ruh kin sa leh kumjuh. U Saleng ruh u ju kren bha ïa ki jingshisha, uba stad uba shemphang, hynrei u bapli, namarba u don ha ka seng Congress, un hap bud lang shabar. Hynrei haba sngap pat ïa ki jingkren jong u, lah sngewthuh: um dei u ñiang-kohnguh. Hato u MP jongngi un mih? Hynrei, u dei ban shong beit marwei ne bad katto-katne ki MP kiba stad, ki bym kyrhuh lymmuh, bad kin ioh ïa ka burom ha Lok Sabha. Haba don tang khyndiat ngut, te u Lamphang un hap ai kren beit, ha kaba yn sngap, ym tang da u, hynrei yn sngap ruh, naduh U Myntri Rangbah bad baroh ki Myntri/MP bad ka lah ruh ban long “Pin-drop-silence” ha Lok Sabha haba lah mih da ki spah shabar, lah iohi ruh ba don, ki bym lehrain shuh ban ïaleh drama,ïa u Vice-President, ki pyrthuhba u khih, u ïaid kumno. Lah pynlehraiñ ïa ka Ri India, ïa kaba ka kyrteng jong ka; ka paw ha ka Baibl ha Ka Kitab ka Esther 1:1. Ha ki por kiba kham mynshuwa, kam da don eh kata ka jingpyrkhing ban leit rung ha ïingdorbar. Tang ka vote ruh ngim don, ba dang rit ka rta, ngi ju leit sha ïingdorbar, tang ban sngap ïa u Dr (L) Barrister Pakem, bad tang ïeng une u Rangbahbastad / ba shemphang ban kren, kynjah jar ka ïingdorbar. Bad ka Telegraph, ka thoh ha ka 18.12.1999, ba kiba bun, ki ju ong ba u dei u myntri uba tbit tam, kaba ka tnad pule-puthi, ka Jylla Meghalaya, ka ioh.
Ko paidbah bashlur-baluilui, balei phi ïa khnuim bad ïa bitar ba pynjlan ïa ka elekshon MDC ? Kane baroh ka dei ka jingpynïaid bastad U Blei. Ki Proberb 29:11- Uba bieit u shu pynmih noh ïa la ka jingbitar baroh: hynrei u briew ba stad u khangnoh ïa ka bad u pynjai jai ïa ka. Ka dei kaba shisha ba bun ki khun samla ka Ri, kiba 18 snem shapoh; ki mih shakhmat ban ai mynsiem ïa ka seng kaba kin sa kyrshanhadien-habud. Ka MDC elekshon kan hap long beit ha kawei ka sngi. Kane ka jingpynjlan ka long pynban ka jingkyrkhu ïa ki baroh, da ki hajar ki lah dap bad kin dang dap 18 snem ka rta. Kito kiba 17 snem tam ka rta, ne kito ki ban dang dap 18 snem ha kine ki sngi/taiew/bnai ki ban dang wan, ki lah ban apply lypa, ban pynrung kyrteng, ha ka electoral roll,ym donkam ban ap ïa ka sngi kha kaba 18.Wat ju buh-teng ong ka ktien tymmen.
Ki jingïalap elekshon ha Ri India, mynta ki sngi, ki long kiba i kulmar bha, ka jingïabeiñ-jingïakhoh ka jur bha, ki kren kat shaba lap ba shem, ki kyrhuh da ka jingdom ïa kiwei ki seng, ki kren ïa ka bym shisha, ki pynsngewthuh bakla, ki kren kulmar ïa ka niam Hindu, ka jingkob-pia, ka jingsarong ka lah kiew sha khlieh, ki jingkular kiba bun, ki paidbah ba sian, ki tip ba ym lah ban long, bad ki ba shida, ba lui-lui, ki pyrkhat ba tang lah ai vote : khata khat khata khat khata khat lah ioh shilak shisnem. Ngi dom, ngi ïarkhie ïapler, ba i danda ïa ki rukom ïalap elekshon, hynrei ym bit ban rkhie beiñ ïa kitei baroh. Ngim tip, lehse kine kiei-kiei baroh, ki lah pynbitar ïa U Trai. Ka Kitab Ki Salm lynnong kaba 2: 1-ter ter – Balei ba ki jaidbynriew ki ïa bitar lep? Dkhot 4 – Uta uba shong ha ki bneng un rkhie : U Trai un rkhie beiñ ïa ki. U Trai u punkut “Suk kita kiba shaniah ha U”.
