Shillong, Jylliew 16
Wat la ka Brazil ka la pynkhreh bha ïa lade na ka bynta ka lympung Copa America 2024 ka ban sa long shen, hynrei kum ka kynhun ki rangïalehkai pat kin don hapdeng ka jingkyndit bad sngewsih ban ïohi ba uwei na ki khlur ïalehkai jong kane ka ri, u Ronaldinho u la pynbna sha ka pyrthei ba un nym peit satia tang kawei ruh ka jingïalehkai jong kane ka ri kaba u la ju ïalehkai teng.
Ha ka jingthoh kaba u la buh ha ka rynsan social media ka jong u ha ka Instagram, u la shim ba ka thup ki rangïalehkai ba mynta jong ka Brazil, ka long kawei na ki thup kaba sniew bad pulom tam ha kine ki snem ba la leit. Kawei na ki ri, kaba kum ki nongshong shnong kiba la kham noh rta ki la ju sakhi ïa ka jingjop bun ki khusnam ha ki por ba la leit, mynta pat kane ka Ri ka la hiar bad kam shym la jop shuh kino kino ki khusnam la katto katne.
U Ronaldinho uba la ïadon bynta ha ka jingjop ïa ka lympung World Cup bad ka Brazil, u la ai jingmut ba kane ka kynhun ki rangïalehkai ba mynta, kim don satia ki nongïa-lam bad ki don ruh ïa ki rangïalehkai, ki bym don mynta ha ka rukom ïalehkai kaba tbit.
U la ong, “Kane ka dei ka kynti kaba sngewsih bha na ka bynta kito kiba ieid ïa ka rukom ïalehkai phutbol ka Brazil. Ka long kaba eh ban wad ïa kata ka jingsngewtynnad ban peit ïa ka jingïalehkai. Kane ka lah ban dei kawei na ki kynhun kaba sniew tam ha kine ki snem, kam don ha ka ïa u nongïalam bad don tang ki rangïalehkai kiba shu biang.”
U Ronaldinho uba la khur ruh ïa ka khusnam Ballon D’or, u la kynthoh tyngeh ïa ka jinglong jingman jong ki kam ïalehkai phutbol ha Brazil bad shim ruh ba wat ha ki rangïalehkai ruh ym ïohi shuh ïa ka jingieit na ka bynta ka sopti kaba ki phong, kaba mynshwa kiba bun ki rangïalehkai ki hap ban ïakhun tyngeh ban ïoh phong.
