Shillong, Jylliew 16
Ka kyrteng jong u Andy Murray ka la rung sha ka thup jong saw ngut ki nongïalehkai tennis jong ka Great Britain na ka bynta ka lympung Paris Olympics, ka ban dei ruh ka sien kaba san ka jong u ha kane ka lympung.
U Murray, uba la ju ong ba u kwah ban shong-thait noh ha une u snem, u la ïoh jaka ha ka ITF ban ïakhun ha ka lympung French Open ha Roland Garros wat la u la hiar bha ka kyrdan kata shaduh ka kyrdan kaba 97 tang na-mar ba u la dei teng u lahduh ha ka Grand Slam bad ruh ba u la khur takma ksiar ha ka Olympic.
Lah ban pynkynmaw ba ha ka sngi Palei ruh ka Team GB ka la pynbna ba ka lahduh jong ka US Open ha u 2021 ka Emma Raducanu kan don ha ka jingïakhun na ka bynta ka jaka ha ka ITF, hynrei ka Raducanu ka la kyntait ïa kane ka lad namar ka jingbun ki jingpynkylla ha kine ki taiew ban wan bad ruh ba ka dang shu wan phai na ka jingshitom kaba la neh slem.
U Murray, uba la khur takma ksiar ha ka Olympic ha London 2012 bad Rio ha u 2016, un dei uwei napdeng ki saw ngut ki rangïakhun marwei ba la shah jied kata kynthup ïa u Jack Draper, Cameron Norrie bad Dan Evans, katba ka Katie Boulter pat kan dei tang maka, marwei ka kynthei ban mihkhmat ïa ka Britain.
Katba u Joe Salisbury bad u Neal Skupski pat kin mihkhmat ïa ka kynhun ka Britain ha ka men’s doubles bad u Murray bad Evans ruh ki la shah jied ban buh jaka lypa ha kane ka jingïakhun, ka ban sa peit pat da ka ITF, kaba dei ka Synjuk ka ban pynïaid ïa ka lympung ha ka 25 tarik mynta u bnai.
