New Delhi, Jylliew 23
U Myntri Kam pohïing bad Cooperation jong ka Sorkar Pdeng, u Amit Shah u la pynïaid ïa ka jingïalang ban peit bniah ïa ka jingpynkhreh ban ïaleh pyrshah ïa ka jingshlei um ha New Delhi mynta ka sngi.
U Myntri Kam Pohiing u la peit bniah ruh ïa ki sienjam ba jrong samoi ban wanrah ïa ka mat treikam kaba ïahap ban pynduna ka jingeh jong ki jingshlei um ha ka ri.
Ha ka jingïalang, u Myntri Kam Pohiing u la peit bniah ruh ïa ka sienjam ba la shim ha kaba ïadei bad ki rai ba la shim ha ka jingïalang ba la long ha u snem ba la dep.
Nalor kane, la ïakren ruh ïa ka jingpdiang ïa ki teknoloji bathymmai da baroh ki ‘agency’ bad ka jingpynïar ïa ka rukom treikam jong ki ban ïada ïa ka jingshlei um. U Amit Shah u la peit bniah ruh ïa ki jingpynkhreh ban ïaleh pyrshah ïa ka Glacial Lake Outburst Flood (GLOF).
U la ban jur ïa ka jingpyndonkam pura ïa ka ‘Satellite Imagery’ ba la pynbit pynbiang da ka Indian Space Research Organization (ISRO) da ki ‘agency’ bapher-bapher ban ïada ïa ka jingshlei um bad ka jingïada ïa ka um.
U la kyrpad ïa baroh ki Jylla bad ki Union Territory ban pyntreikam ha ka por ïa ki jingai jingmut jong ka NDMA ban ïada na ka jingshlei um. U la bthah ruh ïa ka India Meteorological Department (IMD) bad ka Central Water Commission (CWC) ban pyndep kloi ïa ka kam ban pynthymmai ïa ka rukom pyndonkam ïa ki atiar ba pyndonkam ha ka jingbatai lypa ïa ki jingshlei um.
U Shah u la bthah ïa ki tnad ba dei khmih ban pynlong ka jingwad bniah ha kaba ïadei bad ki jingshlei um ba dang shen ha Sikkim bad Manipur bad ban phah ïa ka kaiphod sha ka Tnad Kam Pohïing.
U la bthah ruh ban pyntikna ba ki ‘Floodgate’ jong baroh ki dam kiba heh ki long kiba bit ba biang bad ba ki jaka pdeng kiba peitngor ïa ka jingshlei jong ka CWC ki dei ban long katkum ki jingdonkam bad katkum ki jinglong jingman ha kiwei kiwei ki ri.
U Myntri Kam Pohïing u la ong ba ki don ki wah kiba kham khlaiñ ka jingtwa khyndew bad ka jinglang ka ktieh hapoh kaba wanrah ïa ki jingshlei um. Kumta la bthah ba dei ban shim ïa ki sienjam ban kyntiew ïa ka rukom ai jingtip lypa ha kaba ïadei bad ka jingkiew ka um ha ki wah na ka bynta ban ïada na ka jingshlei um.
Shuh shuh u Shah u la ong ba ka rukom pynïaid ïa ka nala ka dei ban long ka bynta ba kongsan jong ki jingsaiñdur ïa ka jingshna ïa ka surok ban lait na ka jingshah tap um ki surok, lada don ka jingshlei um.
U la ong dei ban shna kumba 50 tylli ki pung kiba heh ha ka Thaiñ Shatei Lam Mihngi khnang ba yn lah ban pynïaid ïa ka um jong ka Wah Brahmaputra sha kine ki pung. U la ong ruh ba kane kan ïarap ban kyntiew ïa ki kam rep, kam pynpoi sha ki jaka rep bad kam jngohkai ha kito ki jaka ha ka jinglut kaba duna bad ka ïarap ruh ban tehlakam ïa ki jingshlei um, bad kan long ka jingmyntoi ïa ka ïoh ka kot ha ka thaiñ.
